Disa orë pasi persona të panjohur i kanë vënë flakën xhamisë së vetme në qytetin Geelon, në shtetin federal të Victoria-s në Australi, peshkopi i kishës anglikane ia ka ofruar bashkësisë muslimane hapësirat e kishës për të falur namazin derisa të riparohet xhamia.
Fjala është për objektin fetar që i ka hapur dyert në vitin 1993, kur bashkësia islame lokale e pati blerë ndërtesën e kishës dhe e pati adoptuar për xhami.
Xhamia është dëmtuar në masë të madhe nga zjarri i shpërthyer herët në mëngjes, ndërsa kanë nisur hetimet për të gjetur zjarrvënësit. Popullata lokale ka ngritur dyshime për një grup antimusliman, si dhe për një grup tjetër, i cili nga nëntori i vitit të kaluar disa herë u pati vënë zjarrin disa kishave në atë qytet australian, njofton agjencia turke e lajmeve Anadolu Agency.
Inspektori i policisë, Graham Banks, ka deklaruar se policia mendon se edhe ky rast ka lidhje me djegien e mëhershme të kishave, duke njoftuar se hetimet janë duke vazhduar.
Edhe pse muslimanët lokalë e kishin rinovuar pjesën e brendshme të kishës, duke ua përshtatur ritualeve fetare islame, pjesa e jashtme e kishte ruajtur pamjen origjinale. Policia dyshon se pikërisht ky fakt i ka shtyrë vandalët ta kryejnë këtë akt të ulët.
Imami Muhammed Ramzan do të thoshte se është djegur xhamia e vetme në qytet, e se kjo është një tragjedi dhe ditë pikëllimi për gjithë shoqërinë, jo vetëm për muslimanët lokalë.
“Australia është vend shumë i bukur, dhe në të jetojnë njerëz të mirë. Incidente të shëmtuara si ky do të na bëjnë edhe më të fortë. Nuk do të përkulemi para vandalëve, por do ta ndërtojmë xhaminë dhe do të vazhdojmë të përhapim mesazhe të paqes dhe bashkëjetesës,“ ka theksuar imami, i cili është me prejardhje nga Pakistani.
Mbështetja për komunitetin musliman ka ardhur nga gjitha anët, ndërsa peshkopi i kishës anglikane, Philip Huggins, ka shprehur gatishmërinë për ta lëshuar sallën e kishës për nevoja të muslimanëve, për faljen e namazit, deri në riparimin e xhamisë. /tesheshi.com/
