Sot në Dibër është heshtje zgjedhore, një ditë para se të shkohet në kutitë e votimit për të zgjedhur kreun e ri të bashkisë, njeriun që do i zërë vendin Shukri Xhelilit, të larguar pas një skandali seksual.
E majta kandidon me Muharrem Ramën, një kirurg në spitalin e qytetit. Ai konsiderohet si figura më e gjetur e PS-së që bëri të mundur fashitjen e shijes së hidhur që la Xhelili me gjestin e tij abuzues zbuluar faqe botës, por dhe si tërësisht i mundshëm që e majta ta rifitojë bashkinë.
Ndërsa e djathta kandidon me Sherefedin Shehun, që ndryshe nga Rama vjen nga Tirana, pasi është larguar nga Dibra vite më parë. Edhe ai konsiderohet një kartë e fortë e PD-së për ta rimarrë bashkinë pas humbjes në “Lokalet” e 2015-ës.
Fushata e tyre, edhe pse përfundoi me gjak pas rrahjes së një aktivisti të majtë për të cilin u përfol se shpërndante para për vota, ka qenë përgjithësisht brenda një etike të pranueshme, e cila reflektoi dhe staturën e tyre publike si individë përgjithësisht me reputacion pozitiv. Për më tepër, funksionoi dhe një pakt xhentëllmenësh i vënë mes tyre në distancë për të mos e fshikulluar njëri-tjetrin në mënyrë nominale në fjalorin elektoral, kjo për shkak të një koinçidence, atë të të qënit krushq.
Madje PD i qëndroi kësaj deri në ditën e fundit, ku dhe në fjalimet përmbyllëse të fushatës, kandidati Rama nuk u anatemua si emër. Ndërsa nga kahja tjetër nuk ndodhi e njëjta gjë. Kryeministri Rama tha për Shehun se nuk do ta emëronte as magazinier.
Zgjedhjet e së dielës në Dibër janë një test politik i rëndësishëm si për mazhorancën ashtu edhe për opozitën, një vit para se të shkohet në zgjedhjet e përgjithshme parlamentare. /tesheshi.com/
