Ministri i Punëve të Jashtme të Serbisë, Ivica Daçiç ka deklaruar se është i gatshëm për të dialoguar me Prishtinën. Deklarata e tij është bërë në Hamburg, ku po zhvillohet një takim mes ministrave të jashtëm nga shtetet anëtare të Organizatës për Siguri dhe Bashkëpunim në Evropë.
“Serbia është e përkushtuar për dialogun me Prishtinën, nën përkujdesjen e BE-së si dhe për zbatimin e të gjitha marrëveshjeve të arritura”, është shprehur Daçiç, duke shtuar se është gati për zbatimin e marrëveshjeve që ndërlidhen me krijimin e Asociacionit të komunave serbe.
Në këtë takim ka marrë pjesë edhe ministri i Jashtëm, Ditmir Bushati. Ai e vuri theksin se për çeshtje që kanë të bëjnë me Kosovën duhet të diskutohet kur ajo të jetë e pranishme në tryezë.
“Ballkani Perëndimor ka përparuar mirë në kuadër të bashkëpunimit rajonal dhe mezi presim ditën kur edhe Kosova do të ulet rreth kësaj tryezë si një shtet pjesëmarrës. Deri atëherë, ne inkurajojmë fuqimisht kryesinë e ardhshme austriake që të eksplorojë të gjitha mundësitë që kjo organizatë të mos diskutojë për Kosovën, pa Kosovën”./tesheshi.com/
