Pasi rasti i dhunimit të një fëmije 3-vjeçar nga administratorja e një ndër kopshteve private në Tiranë u bë mediatik, ka reaguar edhe ministrja e Arsimit, Lindita Nikolla.
Ajo u ka bërë thirrje prindërve të jenë bashkëpunues dhe të denoncojnë çdo rast dhune ndaj fëmijëve të tyre, në mënyrë të tillë që të tilla ngjarje të mos përsëriten më.
Ministrja bëri me dije se do të vendosë në dispozicion të gjitha mjetet e nevojshme për të bërë denoncimin, ndërsa e pyetur në lidhje me inspektimin dhe legalitetin e këtij kopshti ajo tha se nuk mund të trokasë pas çdo dere që qëndron e mbyllur në ambiente private.
“Inspektimi është bërë më përpara. Kemi bërë një raport për kopshtet që operojnë në mënyrë legale në Shqipëri. Nuk mund të trokasim prapa çdo porte që qëndron e mbyllur në pallat apo shtëpi”, – tha ministrja.
Ajo shtoi se nëse do të kishte dijeni për të tilla institucione ilegale, ato nuk do të ekzistonin.
“Ne kemi hequr licenca edhe për institucione që nuk i përmbushnin kushtet”, – ishin fjalët e ministres.
Mbrëmjen e djeshme në emisionin investigativ “Stop” u shfaq rasti i dhunimit të një fëmije 3-vjeçar në një kopsht privat, nga administratorja e kopshtit.
Ky nuk është rasti i parë i dhunimit të fëmijëve. Të tilla denoncime kanë raste precedente atë të dhunimit të fëmijëve në Shkodër e Durrës. /tesheshi.com/
