Bullgaria është kthyer në një vend ku ksenofobia ndaj emigrantëve ka arritur kulmin. Përveç Greqisë, mbyllja e kufirit me Maqedoninë ka penalizuar dhe Bullgarinë fqinje, ku janë dyndur një numër i madh të ardhurish nga vendet e Lindjes së Mesme.
Policia bullgare është e njohur që prej dy vitesh për brutalitetin e saj në trajtimin ndaj refugjatëve. Forcat policore bullgare nuk lejojnë kalimin e kufirit dhe i kthejnë mbrapsht refugjatët, të cilët kanë gjetur një rrugë alternative dhe shkojnë nëpër shtëpitë e banorëve të fshatrave kufitarë.
“Nga kufiri, largësia me fshatin tonë është vetëm 7 kilometra. Të gjithë ata që nuk arrijnë të kalojnë gardhin e ndërtuar nga shteti, vijnë tek ne,” thotë Kosta 76-vjeçar ndërsa kulloste dhitë në një livadh. Ai është një nga 18 banorët e fshatit Dolno Jabalkovo, një zonë e banuar ku furnizimi ushqimor vjen tre herë në javë dhe telefonat celularë nuk kanë valë.
Por kohët e fundit fshati Dolno Jabalkovo është vendosur në kryetitujt e gazetave, në saje të Dinko Valevës.
I riu nga qyteti fqinj, Yambol-i, është bërë një hero i shtypit tabloid për shkak se me patrullat e tij me motorë privatë, dhe me një autoblind, ka sulmuar dhe ka larguar 25 refugjatë, për t’i çuar më pas në polici.
Dinko po përpiqet të mbledhë vullnetarë për “gjuetinë ndaj refugjatëve”. “Të gjithë po merren me shpullat që u dhashë atyre, por ata donin të më vrisnin,” ka treguar djaloshi në një intervistë televizive.
Mbi gatishmërinë e tij për dhunën, Valev është mburrur para kamerave: “Në qoftë se refugjatët janë të gatshëm të vënë bomba, përse unë të mos i sulmoj,” ka thënë ai.
Dinko ka ngritur të ashtuquajturat “patrulla civile”, që bëjnë kontrolle në rripin kufitar. Iniciativa ka tërhequr dhe vëmendjen e policisë bullgare.
Ministrja e Brendshme bullgare, Rumyana Bachvarova, u bëri thirrje mediave që ta informojnë policinë nëse kanë informacion për veprimtari të paligjshme, ndërsa deklaratat luftënxitëse dhe njoftimet e Dinko-s i ka quajtur “të pazakonta”.
“Dinko nuk duhet të merret seriozisht,” thotë një politikan lokal, i cili kërkoi të mbetej anonim. “Ai dëshiron të tërheqë vëmendjen dhe bën veprime agresive me tërheqjen e një autoblindi me kalin e tij në fshat, duke bërë propagandë raciste.”
Sipas deklaratave të tij, Dinko është një tregtar i suksesshëm skrapi, i cili udhëton shpesh jashtë vendit. Kohët e fundit, thotë ai, ishte në Damask, ku ka shitur pjesë makinash. Në Facebook ka shkruar se “Damasku është vend për xhihadistët”.
Bariu i moçëm, Kosta, është i zemëruar nga agresiviteti ndaj refugjatëve: “Si mund të flasin kështu? Njerëzit i ikin luftës, vijnë lakuriq, këmbëzbathur dhe të etur. Çfarë bën Dinko? Do t’i therë këta njerëz?”, thotë ai. Por, gjithsesi, Kosta mbetet një zë i vetmuar në ortekun e dhunës verbale që ka pllakosur Bullgarinë.
Marrë nga B92 – /tesheshi.com/
