Një ndërtesë 17-katëshe është pushtuar nga flakët në kryeqytetin iranian, për t’u shembur më pas e për t’u marrë jetën më së paku 30 zjarrfikësve.
Plasco, një godinë e njohur në Teheran, e ngritur në fillim të viteve ’60 të shekullit të shkuar, ka marrë flakë këtë të enjte. Veç viktimave, nga shembja e saj janë plagosur dhe 75 persona.
Ndërtesa kishte në të një qendër tregtare, si dhe shumë punishte veshjesh. Rreth 200 zjarrfikës janë thirrur në ndihmë në orët e para të mëngjesit; ata janë përpjekur për shumë kohë ta shuajnë zjarrin.
“Mendohet se shumë kanë mbetur nën gërmadha. Shitësit dhe blerësit ishin akoma brenda ndërtesës kur ra zjarri dhe ndodhi shembja,” njoftoi Press TV.
E ndërtuar nga një afarist hebre iranian, Plasco ishte ndërtesa më e lartë në Teheran në kohën e ngritjes së saj. /tesheshi.com/
