Deklaratat politike dhe dyshimet për blerje votash janë konfirmuar me emra konkret. Kryebashkiaku aktual i Vorës, Fiqiri Ismaili i cili rikandidon sërish për Partinë Demokratike për marrjen e një tjetër mandati, akuzohet për blerje votash.
Burime zyrtare nga policia konfirmojnë se nisi procedimi penal në gjendje të lirë për 50 vjeçarin Fiqiri Ismaili, me detyrë kryetar i Bashkisë Vorë, sepse në zyrën e firmës “Agron Blend” Vorë, u ka dhënë nga 10 000 lekë të reja (ose 100 mijë të vjetra) shtetasve B.S., 45 vjeç, banues në Vorë dhe Sh.B., 49 vjeç, me qëllim blerjen e votës në zgjedhjet vendore të 21 qershorit.
Blerja e votës në Vorë, u denoncua pak ditë më parë edhe nga Lëvizja Socialiste për Integrim, e cila e akuzoi kandidatin Ismaili për blerje votash me miell, por edhe për shtim në mënyrë fiktive të votuesve në Bashkinë e Vorës. /tesheshi.com/
