Një autokolonë që mbante trupin e ish-kryeministrit Shinzo Abe, i cili u vra dje, mbërriti sot në shtëpinë e tij në kryeqytetin japonez, Tokio, nga pjesa perëndimore e vendit ku ndodhej kur u sulmua. E veja e Abe, Akie, shoqëroi trupin e tij.
Autoritetet po shqyrtojnë masat e sigurisë në vendin e ngjarjes në qytetin perëndimor japonez Nara, ku Abe po mbante një fjalim fushate kur u sulmua, dhe shefi i policisë së qytetit tha se nuk mund të mohonte se kishte probleme me sigurinë e të ndjerit.
Turma qytetarësh ishin mbledhur jashtë rezidencës së Abe si dhe në vendin e sulmit, ku një person i armatosur qëlloi dhe plagosi rëndë ish-kryeministrin. Vdekja e 67-vjeçarit Abe, i cili mori dy plumba në qafë, u njoftua pak orë pas sulmit, pavarësisht përpjekjeve të një ekipi prej 20 mjekësh.
Disa media, duke cituar burime policore, raportuan se autori i dyshuar i sulmit, i cili u arrestua në vend, besonte se ish-kryeministri ishte i lidhur me një organizatë fetare, të cilën ai e akuzon si përgjegjëse për shkatërrimin financiar të nënës së tij dhe shpërbërjen e familjes së tij. Policia nuk i ka dhënë emrat e grupit. 41-vjeçari i papunë, një ish-anëtar i marinës japoneze, sipas mediave lokale, përdori atë që policia tha se ishte “një armë e improvizuar”.
I dyshuari, i quajtur Tetsuya Yamagami, u tha hetuesve se kishte vizituar vende të tjera ku Abe kishte bërë paraqitje në fushatë, duke përfshirë qytetin e Okayama, i cili është më shumë se 200 kilometra nga Nara.
Në kohën e sulmit, Abe po bënte fushatë në Nara për zgjedhjet e dhomës së sipërme që do të mbahen të dielën. Kryeministri japonez Fumio Kishida deklaroi të premten se përgatitjet për zgjedhjet, “baza e demokracisë”, po vazhdojnë normalisht.
Vrasja e një prej politikanëve më të njohur japonezë, të cilin ai e drejtoi për tetë vjet, tronditi dhe shkaktoi pikëllim brenda dhe jashtë vendit. Shumë persona shkuan në vendin e sulmit për të nderuar ish-kryeministrin.
Varrimi i Abe do të bëhet të martën në prani të të afërmve dhe miqve, raportojnë mediat japoneze. Për momentin nuk dihet nëse do të ketë një ceremoni publike në kujtim të tij.
Ish-kryeministri dhe kryetari i Partisë Liberal Demokratike ishte një figurë, shtysa dhe vizioni reformist i së cilës vulosën transformimin e Japonisë nga një vend i mundur i pasluftës në një fuqi rajonale në rritje në shekullin e 21-të.
Në veçanti, politikani i vrarë riformoi imazhin ndërkombëtar të Japonisë drejt një roli dinamik në sistemin ndërkombëtar, ndërsa gjatë gjithë rrugëtimit të tij ai i shërbeu vendit me qëndrueshmëri dhe mprehtësi, duke siguruar ritme të larta rritjeje për shumë tremujorë radhazi falë politikës së tij fiskale. /tesheshi.com/
