“Babalja” vijon të mbetet top-temë e politikës dhe e medias shqiptare, ku çdo ditë prezantohet nga një detaj, nga një fakt ose e dhënë, e cila e mjergullon akoma dhe më shumë të vërtetën e një afere në terma politikë, me elementë thrilleri gjithashtu politik, të denja për një film. Dhe ka aq sosh, sa vështirë të merren të gjitha në analiza të imtësishme, për të nxjerrë në pah nuanca të së vërtetës së madhe e të akullt, që si në çdo zhvillim kur ka mister, është një dhe vetëm një, pavarësisht se dy palët e pretendojnë atë.
Një prej qindra detajeve është dhe kuota 100 mijë euro, që kunetërit Albert Veliu e Fredi Alizoti, do merrnin secili për kokë si shpërblim për aktrimin e zërit, apo dialogimit me personazh vëllanë e ministrit të Rendit Fatmir Xhafaj – Agronin.
Kjo ka dalë nga përgjimet e Prokurorisë dhe është marrë si një e vërtetë e padiskutueshme, në këtë rast nga ana e mazhorancës. Ndërsa opozita nuk e ka trajtuar, duke i mëshuar me fort një tjetër vidoje ku Alizoti pretendon se është joshur nga pushteti për shërbimin e të “penduarit” në aktin e aktrimit.
Ajo që vlen për t’u analizuar në këtë rast është shifra 100 mijë euro. Siç po zbulohet dita-ditës, të dy personazhet përfaqsojnë një nivel mjaft të ulët qytetar. Profili i tyre njerëzor është krejt i rëndomtë, në nivele krejt ordinere, referuar dhe modelit jetësor që kanë patur e kanë. Në këtë aspekt, 100 mijë euro ngjan si një shifër tejet e ekzagjeruar për tipologji që mund të shiten e blihen për fare pak, për shumëfish më pak. 100 mijë euro për një aktrim, do ishin të denja për individë që janë nëna e këtyre lloj shërbimeve me risqe, për njerëz të rafinuar në kësi punësh dhe që e mbajnë lart në pretendime.
Megjithatë, përmasat e çmendurisë së kësaj afere, mundet që në një çast dhe ta bëjnë të besueshme shifrën, por racionalisht ajo është e pabesueshme. /tesheshi.com/
