Trupat e 39 personave që janë gjetur në një kamion mallrash në Essex të Anglisë Lindore kanë kthyer vëmendjen për një krizë të trafikimit të qenieve njerëzore dhe kriminalitetit që mbart në vete ky aktivitet.
Por çfarë dimë deri tani në lidhje me rastin? Kush janë viktimat?
Policia e Essex tha në një deklaratë se kishte marrë raportet e para për trupat e gjetur në një kamion në Parkun Industrial Waterglade në Grays pak para orës 01:40 të mesnates. Qyteti është rreth 15 km në lindje të Londrës.
Trupat u zbuluan nga stafi i ambulancës, dhe policia më vonë tha se “për fat të keq të gjithë 39 personat brenda kontejnerit kishin vdekur”.
Kombësitë e viktimave nuk janë bërë ende me dije, por policia paralajmëroi se identifikimi zyrtar “mund të ishte një proces i gjatë”.
Fillimisht u tha se kamioni mund të kishte ardhur nga Bullgaria, por më vonë ata deklaruan se automjeti hyri në Mbretërinë e Bashkuar nga Belgjika.
Ministria e jashtme bullgare tha në një deklaratë se “trupat ende nuk janë identifikuar, por policia thotë se nuk ka gjasa që ata të jenë bullgarë.”
Po kamioni?
Policia e Essex beson se kamioni mbërriti në qytetin Purfleet në lumin Thames nga Zeebrugge, Belgjikë, rreth orës 00:30 pas mesnatës së të mërkurës.
Prokurorët belgë kanë nisur një hetim për të përcaktuar nëse rimorkio po udhëtonte nëpër Belgjikë.
Policia më pas korrigjoi deklaratën e tyre të mëparshme që thoshte se kamioni kishte hyrë në Mbretërinë e Bashkuar në Holyhead, një port i madh irlandez.
Sidoqoftë, kryeministri irlandez Leo Varadkar tha se do të ndërmerren hetime për të parë nëse kamioni kishte kaluar nëpër Irlandë.
Richard Burnett, shefi ekzekutiv i Shoqatës së Transportit Rrugor, thotë se kontejneri ishte një pajisje ku temperaturat shkonin minus 25 grade.
Dje në mbrëmje, kamioni u zhvendos në një vend të sigurt në mënyrë që trupat të mund të identifikoheshin në mënyrë të dinjitetshme.
Shoferi i kamionit është identifikuar si Mo Robinson, 25 vjeç nga Irlanda. Ai është arrestuar nën dyshimet për vrasje dhe po merret në pyetje nga policia. Autoritetet shtuan se shtëpitë ku ai kishte banuar janë bastisur dhe po kontrolloheshin në detaje.
A ishte kjo përpjekje për të kontrabanduar viktimat në Britani të Madhe?
Autoritetet ende nuk kanë mbërritur në këtë fazë, dhe policia e Essex paralajmëron se hetimi do të jetë “i gjatë dhe kompleks”. Agjencia Kombëtare e Krimit tha që po përpiqet të identifikojë çdo “grup të krimit të organizuar që mund të kenë pasur gisht”. Redaktori i BBC, Mark Easton raporton se kontrabandistët e njerëzve janë duke ndryshuar destinacionet gjithnjë e më shumë.
Agjensia Kombëtare anti-krim e Britanisë i tha BBC-së se të gjitha portet e vendit ishin duke u përdorur për trafikim njerëzor. Sipas tyre, ka metoda edhe më të rrezikshme që po përdoren për të sjellë njerëzit në Britani të Madhe. Më e zakonshmja është fshehja në pjesët e prapme të kamionit, por edhe frigoriferët janë shumë të zakonshëm. Sipas medias britanike, emigrantët paguajnë rreth 10.000 funte për të kaluar në territorin britanik.
Pse Bullgaria ka rëndësi?
Qysh prej vendosjes së telave me gjemba mes Bullgarisë dhe Turqisë në 2016-tën, shumica e azilkërkuesve tentojnë të kalojnë në Evropën Perëndimore në kamionë të fshehur. Kështu, Bullgaria është bërë qarku më i shpeshtë i këtyre kalimeve drejt hyrjes në Perëndim. Edhe në vitin 2015, një kamion i braktisur me 71 trupa u gjet në një autostradë në Austri, ku një bullgar dhe tre afganë janë në burg për krimet e tyre.
Sa migrantë kanë humbur jetën rrugës për në Britani të Madhe?
Ky numër llogaritet nga OKB-ja që nga viti 2014 dhe shifrat janë mjaft të mëdha.
Qysh atëherë, një emigrant afgan u gjet i vdekur në vitin 2014 bashkë me 34 të tjerë që mbijetuan.
Dy të tjerë janë gjetur në vitin 2015 në një ngarkesë mallrash në Branston, Staffordshire. Ata vinin nga Italia.
Në vitin 2016 një 18 vjeçar humbi jetën teksa u kap në pjesën e poshtme të një kamioni në Banbury, Oxfordshire. Po at vit, një tjetër emigrant i ri u gjet i pajetë në Kent, dhe po vinte nga Franca.
Në vitin 2000, 58 kinezë ishin gjetur të pajetë në një kamion në portin anglez të Doverit. Ata kishin humbur jetën si pasojë e mungesës së ajrit. /tesheshi.com/
