Pas uljes në areoportin e Kukësit, duke e inaguruar atë së bashku me një grup emigrantësh kuksianë nga të ardhur nga Londra, kryeministri Rama sqaroi se pse quhet “Zayed”.
“Pse quhet kështu Zayed? Sepse nuk është thjesht një aeroport i ri por njëkohësisht edhe një vend kujtese dhe godina e këtij aeroporti është një edhe një tempull i kujtesës së kësaj toke, kësaj zone, por edhe shqiptarësh nga Prishtina në Tiranë dhe kudo, sepse në këtë zonë u ngrit edhe kampi i madh i atyre që u shpërngulën nga shtëpitë me dhunë, viktima të spastrimit etnik dhe u dyndën drejt Shqipërisë. Atë kohë këtu erdhën shumë njerëz nga e gjithë bota, mes tyre princi i kurorës Mohammed bin Zayed.
Gjurma e kësaj piste është gjurma e kësaj historie të jashtëzakonshme solidariteti për ata që atë moment kishin nevojë për forcën e dashurisë dhe kujdesjes dhe princi i kurorës Mohammed bin Zayed”, tha Rama, duke sqaruar dhe prapashtesën “Flatrat e Veriut”.
“Flatrat e Veriut, pasi këtu në veriun e Shqipërisë, nga Kukësi dhe matanë dhe prej andej nga erdhën motrat dhe vëllezërit tanë është i gjithë veriu i shqiptarëve, ku u shkruajt një nga historitë më tragjike, por me fundin më të lumtur”, theksoi i pari i qeverisë.
Por për çfarë duhet areoporti i Kukësit?
“Shumë njerëz thonë ç’na duhen aeroportet? Shqiptarët janë ndër popujt më të lëvizshëm për hyrje-dalje, për frymë. Jo vetëm kaq, ata që flasin për aeroportet si për luks, aeroportet janë fabrika buke.
Kroacia është 4 milion, ka 9 areoporte. Kroacia është fuqia e 7 e botës në turizëm. Ka 9 porta nga qielli, shfrytëzon gjithë territorin e vet”, theksoi Rama.
Por kur do jetë plotësisht funksional areoporti i Kukësit? Ishte ministrja Balluku që sqaroi këtë detaj.
“Duke nisur nga sot, në këtë aeroport do të nisin të gjitha testet me kompanitë ajrore. Do të nisin nga puna për të lidhur kontrata, për të naviguar procedurat dhe për ta bërë këtë aeroport sa më tërheqës për të gjithë zonën. Dhe kjo do të bëhet sipas rregullave dhe ligjeve në fuqi.
Në datë 17 qershor aeroporti i Kukësit do të jetë totalisht i përdorshëm nga të gjitha kompanitë.
Ky është një aeroport operacional dhe nga ky moment i lihet në dorë koncesionarit që do të lidhë marrëveshje me kompanitë ajrore që nuk janë të pakta. Që këtu do të fluturohet drejt Zvicrës, do të jetë gjeneza e një historie të re”, tha Balluku. /tesheshi.com/
