Grupet punuese të “katërshes” nuk arritën të bëjnë ndonjë përparim më serioz në lidhje me çështjet kyçe për zbatimin e Marrëveshjes së Përzhinos. Negociatorët e kanë lënë veçmas rreth mesnatës Klubin e Deputetëve.
Siç parashihej me protokollin e 15 korrikut, gjer më 20 tetor duhej të arrihej marrëveshja për përzgjedhjen e ministrave, zëvendësministrave, dhe për votimin e qeverisë teknike. Negociatorët kanë ngecur edhe në zgjedhjet e personave të propozuar, por edhe në shtrirjen e kompetencave të zëvendësministrave, të cilët, siç parashikohet në marrëveshje, do të kishin të drejtën e vetos në zbatimin e vendimeve që kanë të bëjnë me keqpërdorimin e institucioneve për zgjedhjet.
Mospajtime më të mëdha ka pasur sidomos rreth Ministrisë për Punë të Brendshme, ku pritej të zgjidhej një ministër teknik i popozuar nga LSDM-ja, me pëlqim të partive në pushtet. Siç tregojnë burimet e TV 21-shit brenda ekipeve negociuese, VMRO-DPMNE ka këmbëngulur që zëvendësministri i emëruar nga radhët e kësaj partie ta ketë të drejtën e vetos në çdo vendim të ministrit, diçka që ka qenë e papranueshme për opozitën.
Qëndrimi i VMRO-DPMNE-së ka qenë i tillë që mjafton të zgjidhet ministri me disa bashkëpunëtorë, por ai të ketë autorizime të kufizuara dhe të mos e posedojë të drejtën për të ndërruar drejtues në MPB. Nga ana tjetër, LSDM-ja ka konsideruar se ministri duhet të ketë autoritet të plotë, kurse zëvendësministri duhet të ketë të drejtë vetoje vetëm për aktivitete të lidhura me zgjedhjet.
Përparim modest ka pasur lidhur me projektligjin për publikimin e bisedave të përgjuara, i cili, siç mësohet, do të ripërpunohet, duke marrë për bazë legjislacionin europian për informatat e klasifikuara, por edhe për mbrojtjen e denoncuesve të sekreteve, të ashtuquajturve “fishkëllyes”. Përparim, sipas informatave jozyrtare, ka pasur edhe lidhur me Komisionin anketues të Kuvendit, i cili duhet të hetojë se kush ka bërë përgjime dhe kush i ka keqpërdorur ato. Sidoqoftë, këta hapa të vegjël përpara në negociata nuk kanë mjaftuar për t’i konsideruar ato si të suksesshme.
SHBA-të kanë shprehur edhe një herë shqetësimin për mungesën e gjuhës së përbashkët të liderëve politikë, për t’u pajtuar në lidhje me zbatimin e marrëveshjes së Përzhinos, pasi dështuan bisedimet maratonë, në të cilat qe i pranishëm dhe komisioneri Johanes Han.
“Jam thellësisht i shqetësuar për shkak të pamundësisë së liderëve që të arrijnë marrëveshje. 
Marrëveshja e Përzhinos është mënyrë se si të sigurohet përgjegjësi dhe të përmirësohen kushtet për zgjedhje të ndershme dhe demokratike, dhe t’i jepet fund krizës politike. Eshtë i nevojshëm vullneti politik për t’u përballur me çështje të tjera të ngelura pa u zgjidhur”, ka shkruar ambasadori i SHBA-së në Shkup, Xhejs Bejli, në profilin e tij në twitter. /tesheshi.com/
