Partia Fjala që udhëhiqet nga deputeti Gëzim Kelmendi ka akuzuar qeverinë e Kosovës për lejimin e kryetarit të Mitrovicës Veriore, Goran Rakiq të udhëtojë me targa provuese të Republikës së Serbisë me veturë zyrtare.
Kjo parti ka dënuar sjelljen e Rakiq, duke u shprehur se ka shpërfillur ligjet e Kosovës dhe ka mohuar shtetësinë e saj.
“Ne, partia FJALA dënojmë fuqishëm sjelljen e kryetarit të komunës së Mitrovicës Veriore Goran Rakiq, i cili mbrëmë rezistoj të i largoj targat e Sërbisë nga vetura zyrtare e Republikës së Kosovës 2Z. Sjellja e tij arrogante shkoj aq larg sa mohoj shtetësinë e Kosovës, duke thënë se “nuk kam nevojë t’i largojë këto targa, ngase ashtu Kosova është pjesë e Sërbisë”, thuhet në kumtesë.
Partia Fjala thotë se situatën edhe më të rëndë e bën fakti që policia e Kosovës, u dorëzua para urdhërave të tij, me presionin që kishte nga qeveria e Kosovës, që këtë kryetar ta lejoj të hy në pikën kufitare ashtu si ai dëshiron, me veturë zyrtare të Kosovës 2Z, por me tabela të Serbisë.
“Është e turpshme dhe e tepruar kjo sjellje e qeverisë së Kosovës që lejon dhe dorëzohet përballë kërcënimeve të një kryetari serb, që paguhet me taksat e qytetarëve të Kosovës dhe që mohon shtetësinë e Kosovës dhe shkel ligjet e Kosovës”, thuhet në komunikatën e partisë Fjala. /tesheshi.com/
