Deputetët e Lëvizjes Vetëvendosje në seancën e sotme të kuvendit janë shprehur kundër vazhdimit të mandatit të EULEX-it, pasi thonë se ky mision i BE-së dështoi për tetë vite dhe nuk mund të pritet të ketë sukses në dy vitet e ardhshme.
Shefi i grupit parlamentar të Lëvizjes Vetëvendosje, Glauk Konjufca, ka theksuar se EULEX-i është krijuar si një ndër misionet më të mëdha dhe më të kushtueshme në vend.
“EULEX-i u quajt mision për sundimin e ligjit. Shpallja e Pavarësisë së mbikëqyrur imponoi EULEX-in për të mbajtur kompetenca në disa fusha si policia, dogana dhe prokuroria. Prania e EULEX-it e tregon pamjaftueshmërinë vendore. Në njëfarë mënyrë EULEX vendos papjekurinë e shtetit të Kosovës”, ka thënë Konjufca.
Gjithashtu sipas tij EULEX ka përfunduar me status neutral që ka ndikuar për të mos kryer punë të mira për Kosovën.
Kurse, deputeti tjetër i VV-së Faton Topalli ka thënë se BE-ja në të gjitha raportet e progresit e ka akuzuar qeverinë për korrupsion, prandaj si mund të pritet që vendi të dal nga kjo gjendje.
“Fakti që EULEX-i nuk e ndryshoi këtë gjendje për tetë vite me radhë, nuk mund të vazhdojë të qëndrojë këtu, as nuk mund të jetë i suksesshëm derisa nuk ka ndryshuar asgjë. Shteti është kap nga politikanët, derisa politikanët janë kapur nga EULEX-i”, ka thënë Topalli. /tesheshi.com/
