Nga Blendi Gashi
Instituti Demokratik i Kosovës ka prezantuar platformën e quajtur “Vota Ime”, me anë të së cilës tash e tutje do të dihet gjithçka që votuesit kosovarë duhet dhe i takon të dijë për njeriun që e votoi si përfaqësues me vetëm një kërkim të thjeshtë në Votaime.org të KDI-së.
Pjesëmarrja në seancë, diskutimet, votimet për e kundër, harxhimet në udhëtime jashtë shtetit, deri te harxhimet për dreka e darka zyrtare do të jenë publike në këtë platformë.
Në KDI thonë se deputetët do të bëhen më përgjegjës e llogaridhënës karshi atyre që ua dhanë votën.
Albert Krasniqi nga KDI ka deklaruar për tesheshi.com se kjo platformë është krijuar pasi është e nevojshme që edhe qytetarët të reagojnë karshi punës për njeriun që e votoi si përfaqësues.
“Kjo platformë mund të shërbejë si komunikim me të zgjedhurit e tyre (deputetët), qytetarët mund të parashtrojnë pyetje e po ashtu edhe të kontribuojnë në krijimin e politikave më të mira. ‘Vota Ime’, pos qasjes shumë më të lehtë të qytetarëve kundrejt deputetëve, do të shërbejë shumë edhe për çështje të tjera, shumë të rëndësishme.Kemi edhe një mundësi për t’i matur votimet e deputetëve se sa janë qëndrimet e tyre në votim në përputhje me deklarimet e grupi të tyre parlamentar. Kjo është bërë për ta parë se si votojnë deputetët krahasuar me grupin e tyre parlamentar. Kjo platformë do të shërbejë edhe si matës se sa harxhojnë në udhëtimet zyrtare, ku kanë udhëtuar deputetët e për çka kanë shkuar në ato vende, madje edhe sa harxhojnë karburante deputetët. Kushdo mund të ketë qasje e t’i gjejë këto të dhëna. Në këtë platformë mund të shihen edhe pyetjet parlamentare që i bëjnë deputetët për ministrat dhe se a përgjigjen ata.
Me këtë platformë qytetarët mund ta shohin se sa kanë marrë pjesë pozita dhe opozita në seance, edhe se çfarë vendimesh kanë marrë. Kjo mund të shërbejë edhe si presion qytetar në kërkim të rregullimit të situatës.Ndërsa disa nga pyetjet e qytetarëve mund të lexohen edhe publikisht. Edhe deputetët mund të përgjigjen publikisht në ato pyetje”, tha ai.
Krasniqi ka bërë të ditur se para se ta lansojnë këtë platformë janë konsultuar me të gjithë deputetët të cilët kanë dhënë vërejtet e tyre.
“Para se ta lansojmë këtë platoformë e kemi dërguar tek të gjithë deputetët në mënyrë që ata të japing ndonjë vërejtje, lëshim. Një numër i tyre na kanë kthy përgjigje, i kanë bërë vërejtjet e tyre çfarë kanë pas dhe na kanë përgëzuar për platformën. Tani të shohim sa kanë me qenë deputetët t’iu përgjigjen qytetarëve pasi është një kulturë e re e komunikimit deputet-qytetarë.
Janë deputetët që i bëjnë pyetje ministrave në Kuvend, tani do të jenë qytetarët që do t’i bëjnë pyetje deputetëve”, ka theksuar ai.
Pyetjet e para të qytetarëve për deputetët e LDK-së
Krasniqi, i cili është menaxher projekti në KDI, ka treguar se për një ditë janë bërë dhjetë pyetje për deputetët, por vetëm dy prej tyre janë kualifikuar si të rregullta, kurse tetë të tjera janë jashtë fushës së veprimtarisë së ligjvënësve dhe nuk janë publikuar.
“Do t’i publikojmë vetëm pyetjet direkte që janë në mandate të deputetit. Dy prej pyetjeve janë për Armend Zemjan dhe Alma Lamën. Ne i kemi kualifikuar si pyetje dhe i kemi përcjellë tek depuetët, ata ende nuk janë përgjigjur”, ka deklaruar Krasniqi.
Ja çfarë pyetën qytetarët Zemajn e Lamën
Portali tesheshi.com ka shikuar pyetjet që qytetarët ia kanë bërë dy deputetëve të LDK-së.
Pyetja e një qytetari nga Gjilani drejtuar Zemajt: “Ku e sheh Armendi LDK-në pas një viti, duke e ditur se procese të mëdha e presin vendin në muajt e ardhshëm, dhe pyetje që tashmë dihet për të gjithë deputetët e LDK-së, a do ta votosh Thaçin për President?”
Kurse, një qytetar nga Peja e ka pyetur Lamën: “Kur do të miratohet ligji për personat me aftësi të kufizuara?”
Pikërisht dy deputetët e lartpërmendur kanë promovuar në rrjetet e tyre sociale platformën e KDI-së, duke e quajtur si projekt të mirë pasi deputetët përmes saj do kenë mundësi të jenë në kontakt me qytetarët, derisa kanë ftuar këta të fundit të mos hezitojnë dhe t’i shkruajnë pyetjet që kanë.
Edhe, Jetmir Bakija nga KDI ka ftuar qytetarët që të bëjnë pyetje për çështje të ndryshme për deputetët.
“Keni pyetje për ndonjë deputetë? Doni të dini si kanë votuar për një çështje? Sa është aktiv një deputet? Sidomos në këto ditë të turbullta qytetarët dhe deputet duhet të komunikojnë. Shfrytëzojeni platformën digjitale vvvvvv.votaIme.org të mirëmbajtur nga KDI”, ka qenë mesazhi i Bakijës.
/tesheshi.com/
