Presidenti turk, Rexhep Tajjip Erdogan, do t’u thoshte gazetarëve gjatë kthimit nga një udhëtim pesëditor në Amerikën Latine se SHBA-të duhet të vendosin se cili është partneri i tyre rajonal, Turqia apo terroristët në Siri. Ai do të kërkonte që aleatët amerikanë dhe bashkësia ndërkombëtare ta njihnin PYD-në, Partinë e Unionit Demokratik, degën siriane të PKK-së, si një organizatë terroriste.
Shqetësimi i Turqisë u shpërfaq javën e shkuar, kur i dërguari i posaçëm presidencial amerikan, Brett McGurk, vizitoi Kobanin dhe zhvilloi bisedime me drejtues të PYD-së.
John Kirby, zëdhënësi i Departamentit të Shtetit, deklaroi dje në Uashington se, “Shtetet e Bashkuara do të vazhdojnë ta mbështesin Partinë e Unionit Demokratik (PYD)… Ky nuk është një shqetësim i ri. Ne nuk e njohim PYD-në si një organizatë terroriste.”
Kirby do të theksonte se SHBA-të dhe Turqia nuk mund të pajtohen për çdo gjë, edhe pse janë aleatë në luftën kundër ISIS-it.
Sipas zëdhënësit, luftëtarët kurdë, posaçërisht ata të YPG-së, krahut ushtarak të PYD-së, janë nga forcat më të suksesshme në përballjen me ISIS-in.
Turqia, në luftë të hapur prej muajsh me PKK-në, organizatën terroriste kurde, është tërësisht kundër njohjes dhe përkrahjes së degës së saj siriane, PYD-së, e krahut të armatosur, YPG-së. /tesheshi.com/
