Autoritetet e Rendit kanë zgjedhur sërish ironinë për t’iu përgjigjur akuzave dhe fakteve të ofruara nga PD-ja mbi shndërrimin e një pjese të mirë të territorit shqiptar në fushëkultivimi kanabisi. Pas denoncimit të veçantë të Sekretarit Salianji, i cili kishte shkuar fizikisht mbi një prej parcelave në Progonat të Tepelenës, fshatin e origjinës së ministrit Tahiri, Policia e Shtetit ka zgjedhur t’i përgjigjet krejt ndryshe.
“Nuk janë të rralla rastet kur PD ka bërë politikë me punën e policisë, ashtu siç nuk është hera e parë që PD bën politikë me rezultatet dhe sukseset e saj.
Policia e Shtetit thekson se lufta kundër kultivimit dhe trafikimit të kanabisit është një luftë e përditshme. Këtë e dëshmojnë rezultatet e arritura, të cilat nuk kanë asnjë referencë krahasimi me kohën e qeverisjes së PD.
Lufta kundër kultivimit të kanabis nuk është e nuk mund të jetë provë e pretendimeve të PD, por vetëm provë e luftës që bën Policia e Shtetit ditë për ditë.
Ftojmë PD të denoncojë raste konkrete pranë autoriteteve të ligjit, e jo të bëjë politikë, aq më pak me vetë punën dhe rezultatet e policisë së shtetit në luftën kundër drogës”, ka qenë kjo deklarata e autoriteve të Rendit, ku sipas asaj çfarë shkruhet e thuhet, nuk është e rëndësishme sasia e jashtëzakonshme e mbjelljes dhe e kultivimit, por operacionet kundër tyre. /tesheshi.com/
