A mund të mendohet se Andi Bushati, një ndër lapsat më të pamëshirshëm ndaj Ramës, të tregohet racional në ndonjë rast e t’i bëjë atij avokatinë ndaj ndonjë prej akuzave që i bëhen, nga ato mitike tashmë? E pamundur por ja që ka ndodhur. Ka ndodhur muaj më parë, kur Bushati avokon Ramën për rastin e Havzi Nelës, asaj pra që opozita, së fundi dhe Meta, pretendojnë se i ati, Kristaqi, ka firmosur varjen e poetit kuksian.
Bushati e sqaron mirë atë rast, duke gjykuar që ndaj Ramës është krejt spekullative t’i mveshësh ndër akuza dhe fatin tragjik të një poeti, për të konkluduar në fund se ai meriton të akuzohet vetëm për aktualen e tij në qeverisje.
Dhe, mes rreshtave të Bushatit, s’ishte e vështirë të dallohet kompleksi i tij si një pinjoll ish-regjimi, ku në fakt po avokonte dhe veten me rastin “Nela”. Gjithsesi, mes Ramës e Bushatit ka diferencë në të djeshmen e tyre në regjim. Bushati realisht ka qenë fëmijë blloku, kokën e së cilit mund ta ketë ledhatuar dora e udhëheqësit, Rama as fizikisht s’ka qenë fëmijë blloku, e për këtë mjafton vendndodhja e shtëpisë së tij në komunizëm, te “Muhamed Gjollesha”.
Dhe ja si vjen puna: i ati i Andit, Mehdi Bushati, s’paska qenë thjesht një dhëndër Kaposh, as thjesht një kuadër i lartë sporti te Dimano, por një sadist Sigurimi.
Eshte ndër ato raste kur për një ish-funksionar regjimi nuk ofrohn thjesht përshtypje negative, nuk thuhet thjesht se ka qenë komunist, porse tentohet të ofrohen fakte reale, vende, emra dhe mbiemra, me protagonist dhune Hamdi Bushatin.
Shkak u bë marrja nga ky i fundit i një dekorate nga ana e presidentit Meta. Edhe ky ishte një gjest i lexueshëm politik, madje nga ato të trashët fare nga ana e Metës. Nuk ka patur ndonjë arsye tjetër sinjifikative veç faktit se i biri Andi po godet pamëshirshëm Ramën, e që për këtë i ati duhet nderuar. Më pas ia beh një reagim nga të përndjekur politike dhe ajo që në 30 vite kishte mbetur e heshur, plas në çast.
Së këndejmi, kuptojmë pse shtresa e të përndjekurve në këto 30 vite nuk ka shfaqur atë hakmarrjenm deri dhe të natyrshme njerëore ndaj një kaste që kanë lyer duart me gjak. S’kanë reaguar gjersa as ata, gjaksorët kanë heshtur e “parë punën e tyre”. Si në rastin e Hamdi Bushatit.
Por në rastin e parë, kur ata harrojnë se ç’kanë bërë, duke zgjedhur të ngrefosen në publik, vjen dhe përgjigja.
Po a ka përgjegjësi në këtë rasti Andi Bushati dhe i takon më të dalë në publik për të kërkuar moral politik nga politika?
Patjetër që po, duke marrë në konsideratë një rrethanë të caktuar; atë që ai e ka ditur se Meta do ndëroje të atin dhe pse do e nderojë. Do e nderojë jo si një ish-figurë sportive por si i ati i të birit që godet Ramën. Por Bushati është mikluar nga kjo, e si duket ka prevaluar dëshira për ta parë babanë me titull mbi një vetërmbajtje të urtë, që siç po duket po i sjell shumë telashe. Nuk dihet se sa ai ka qenë i informuar edhe për dimensionin kriminal të të atit, por dhe pa të duhej ta kishte këshilluar të mos pozonte me Metën.
Por përkundrazi, pozon dhe vetë me një krekosje që ka brenda dhe mesazhin politik.
Dhe kijeni parasysh, Bushati And është ndër ata që fort i mëshon mitit të Ramës që futi kriminelë në politikë. Por krimineli është kriminel, qoftë ai politik e qoftë ai ordiner.
Tani duhet të mbajë faturë, dhe është një faturë që thyhen majën e lapsit. /tesheshi.com/
