Demba Ba nuk do ta lërë futbollin pas dëmtimit të rëndë

Sulmuesi 31-vjeçar nga Senegali theu këmbën në derbin e Shangait të dielën që shkoi, duke e vënë në pikëpyetje të madhe karrierën e tij të mëtejshme sportive.

Tepër të rënda ishin pamjet e incidentit fatkeq për golashënuesin më të mirë të kampionatit kinez. Trajneri i tij te klubi Shanghai Shenhua, Gregorio Manzano, deklaroi pas ndeshjes se dëmtimi mund t’i jepte fund karrierës profesionale të futbollistit.

Por është vetë Demba Ba që ka vendosur të mos dorëzohet, duke pranuar se do të rikthehet të luajë sërish.

“Ky është vërtet një dëmtim i rëndë, por unë mund ta lë pas atë. Nuk do t’i jap fund karrierës sime, kjo është e sigurt,” ka theksuar futbollisti që ka shënuar 14 gola në këto 18 javë të kampionatit kinez.

“Sezoni këtu mbaron në nëntor, e i riu nis në mars. Do të bëj më të mirën për t’u kthyer në kohë për sezonin,” është shprehur Demba Ba.

Ai ka luajtur më herët në Angli për Uest Hemin, Njukasëllin e Çelsin, për të kaluar më pas në radhët e Beshiktashit në Turqi, ku menjëherë do të bëhej një prej futbollistëve më të dashur për tifozët vendas. Ashtu si shumë lojtarë të tjerë të njohur, ai do të kalonte në kampionatin kinez një vit më parë. /tesheshi.com/