Javën e ardhshme, konkretisht ditën e hënë, pritet që Kryesia e Kuvendit të Kosovës të shqyrtojë si pikë kryesore çështjen e Demarkacionit ndërmjet Kosovës dhe Malit të Zi. Lidhur me këtë, kryeparlamentari, Kadri Veseli është shprehur optimist se kjo marrëveshje do të kalojë.
“Demarkacioni është një nga kushtet kryesore për liberalizimin e vizave për qytetarët. Jemi duke punuar shumë seriozisht në këtë drejtim në mënyrën që të kemi sa më shpejt zgjidhje që ky kusht të kaloj, demarkacioni të kalojë me seriozitetin më të madh. Kosovës i duhet një koncencuzs në çështjen e demarkacionit”, tha ai në një konference për media.
Më tej, Veseli theksoi se Kosova ka nevojë për stabilitet politik dhe se në të njëjtën kohë klasa politike duhet t’i plotësojë ato që kërkohen nga qytetarët e vendit.
“Integrimi drejt bashkimit evropian dhe kjo i bie liberalizmi i vizave”, deklaroi Veseli.
Kujtojmë se më 5 shkurt në orën 11:00 është caktuar të mbahet mbledhja e Kryesisë së Kuvendit, ku në pikën e gjashtë të rendit të ditës është paraparë shqyrtim i marrëveshjes së Demarkacionit që në ftesën zyrtare për këtë mbledhje është emërtuar si “Shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi”.
