Shpejtim Bulliqi, kryetari i Komisionit shtetëror për Demarkacionin, ka bërë të ditur se ka nisur punën dhe do të bëjë një analizë të raportit paraprak.
Ai tha se që në fillim janë vërejtur parregullsi që ka bërë ish-Komisioni i kryesuar nga Murat Meha.
“Janë një sërë parregullsish dhe nga ajo që kemi arritur të shohim që në fillim, vërehet një tejkalim i kompetencave. Komisioni nuk ka pasur të drejtë të bëjë delimitacion (caktim i kufirit) të ri të kufirit mes Kosovës dhe Malit të Zi, për faktin se ka ekzistuar një kufi i delimituar që nga viti 1946”, tha Bulliqi, për Radio “Evropa e Lirë”.
Sipas tij kompetenca e Komisionit ka qenë vetëm të gjejë pikat kufitar ku ka kaluar linja kufitare.
Bulliqi tha se analizat do të bëhen edhe na aspektin e së drejtës ndërkombëtare, fakteve hartografike, natyrore dhe atyre në gjeodezi.
“Kur të analizohen të gjitha këto gjëra, sigurisht që do të kemi nevojën që të bëjmë edhe disa vizita të drejtpërdrejta në terren”, ka deklaruar Bulliqi. /tesheshi.com/
