Zyra e Bashkimit Evropian në Kosovë, e udhëhequr nga Natalia Apostolova, nuk e komenton mundësinë që Demarkacioni me Malin e Zi të përfundojë në arbitrazhin ndërkombëtar, mundësi kjo e lënë hapur nga kryeministri Haradinaj.
Zyra e BE-së sqaron se siç edhe është paraqitur në propozimin legjislativ të Komisionit Europian të majit 2016, ratifikimi i marrëveshjes në fjalë është një kërkesë për liberalizimin e vizave.
“I njohim përpjekjet që ka bërë Kosova tani është thelbësore që Kosova të ofrojë kushtet e mbetura të liberalizimit të vizave duke ecur përpara dhe duke ratifikuar marrëveshjen e demarkacionit kufitar dhe duke rritur përpjekjet kundër korrupsionit dhe krimit të organizuar”, vlerëson kjo zyrë në një përgjigje për “Express”, ndërsa refuzojnë të thonë nëse kjo marrëveshje mund të rinegociohet.
Se nuk mund të rinegociohet disa herë e kanë përsëritur edhe zyrtarët malazez të cilët së fundmi i kanë thënë edhe zv.kryeministrit Pacolli se kjo marrëveshje për ta është e përfunduar dhe nuk ka kthim mbrapa.
