Ka nisur sot “beteja” e dytë qeveri-opozitë për çështjen e Demarkacionit me Malin e Zi.
Ndërsa, me iniciativë të kryeministrit Mustafa sot u mbajt takimi i parë i komisioni për matjen e territorit, përfaqësuesit e partive opozitare e bojkotuan atë duke paralajmëruar mazhorancën se sërish do hasin në rezistencë pavarësisht vendimeve që do ndërmerr komisioni i formuar.
“Raporti që do të publikohet përfundimisht nga ky komision, do të miratohet nga qeveria. Edhe qytetarët janë të interesuar ta dinë se sa ka territor Kosova. Edhe bashkësia ndërkombëtare do ta dijë se cili është territori i vendit tonë”, tha Mustafa.
Ai tregoi se dy pjesëtarë të këtij komisioni janë caktuar nga BE, ndërsa ata janë Ali Lajqi dhe Rrustem Selimi, derisa ka njoftuar se komisionit do ta udhëheq kryeakademiku Hivzi Islami.
Ky i fundit, tha se komisioni nuk do të merret me shkaqet e efektet politike, por vetëm do të bëjë matjen e territorit, përkatësisht të secilës zonë kadastrale.
“Komisioni do të qëndrojë larg ndikimeve politike”, tha Islami.
Ideja për këtë komision erdhi para disa javëve meqë një marrëveshje për demarkacionin e kufirit me Malin e Zi e nënshkruar në gusht të vitit 2015, nuk është ratifikuar ende në Kuvend në mungesë të mbështetjes nga ana e deputetëve. /tesheshi.com/
