Seanca e jashtëzakonshme për demarkacionin me Malin e Zi ka nisur me debate, ndërsa jashtë sallës ka pasur protesta. Seanca ishte parashikuar që të zhvillohej ditën e djeshme, por u shty për të premten, pasi nuk u arrit që të sigurohen votat e mjaftueshme për të votuar projektligjin.
Lëvizja Vetëvendosje, edhe pse ka deklaruar se nuk do ta votojë projektligjin, ka vendosur të marrë pjesë në seancë, ndërsa në sallë mungojnë deputetët e Listës Serbe. Kryetari i Vetëvendosjes Albin Kurti u qëllua me vezë derisa hynte në ndërtesën e Kuvendit.
Një qytetar me emrin Islam Krasniqi ka qëlluar Kurtin në shenjë proteste për mosratifikimin e Demarkacionit.
Të pranishëm në seancë janë 93 deputetë. Për miratimin e këtij projektligji nevojiten 2/3 e votave të deputetëve, saktësisht nevojiten së paku 80 vota. Kryeministri Ramush Haradinaj reagoi ashpër ndaj deputetëve që janë kundër Demarkacionit.
Ndërkohë, kryetari i Kuvendit të Kosovës, Kadri Veseli njoftoi se nëse Demarkacioni me Malin e Zi nuk kalon me dy të tretat e deputetëve të pranishëm në në sallë, Kuvendi i Kosovës nuk mund ta kthejë në séance për miratim këtë pike deri në 90 ditë.
Demarkacioni është kushti që Bashkimi Europian i ka vendosur vendit për liberalizimin e vizave, ndërkohë që Kosova mbetet i vetmi shtet në Europë që ka ende një regjim vizash për lëvizjen në zonën “Schengen”. /tesheshi.com/
