Nga Blendi Gashi
Një grup i deputetëve të LDK-së që e kundërshtojnë Demarkacionin i kanë propozuar shefit të tyre, Isa Mustafës, një zgjidhje që do t’i bindte ta votonin këtë marrëveshje ndërkombëtare.
Në një propozim me shkrim dërguar kryeministrit njëherit liderit të partisë, të ashtuquajturit deputetët “rebelë”, thonë se janë të gatshëm ta votojnë Demarkacionin por me kusht që brenda një viti të rishikohet marreveshja e parë dhe,nëse nuk zgjidhet kontesti, çështja të shkojë në Gjykatën e Arbitrazhit.
Deputeti i LDK-së, Adem Salihaj, një nga inicuesit e propozimit ka treguar se iniciativa është bërë me qëllim që të dilet nga kriza.
“Këtë mund ta bëjmë nëse arrihet një aneks marrëveshje me Malin e Zi se marrëveshja e tashme e demarkacionit rishikohet brenda një viti. Në këtë rast ne do ta votonim njëkohësisht marrëveshjen e demarkacionit bashkë me këtë aneks marrëveshjen”, ka thënë Salihaj për tesheshi.com.
Ai ka bërë të ditur se brenda dy ditësh pritet të mësohet nëse do marrin përgjigje për propozimin e bërë.
“Jemi në proces. Brenda dy ditësh do mësohet se çka do bëhet dhe do dalim me njoftim për opinion”, ka thënë Salihaj, duke mos dashur të jap më shumë detaje.
Edhe deputeti tjetër i LDK-së, Shpejtim Bulliqi, më i zëshmi kundër Demarkacionit nuk ka dashur shumë të flas për çështjen në fjalë.
“Cdo iniciativë që ruan integritetin e shtetit dhe krijon kushte për dalje nga situata është e mirëseardhur”, ka thënë Bulliqi shkurt për tesheshi. com.
Për propozimin në fjalë deri më tani ka heshtur kryeministri Mustafa i cili nuk ka komentuar asgjë, ashtu siç nuk ka zyrtarizuar nëse përfundimisht qeveria do e procedoj javën tjetër marrëveshjen për Demarkacionin në Kuvend.
Por tu jetësuar propozimi në fjalë përveç “PO”-së së Mustafës gjithësesi nevoitet edhe drita jeshile nga partneri i koalicionit qeverisës, pra nga PDK-ja.
Deputeti i PDK-së, Shukri Buja, thotë se i vjen mirë që pas një viti deputetët e LDK-së kanë reflektuar dhe kanë pranuar propozimin e tij dhe kolegut Shaip Muja që të ratifikohet marrëveshja në 90 përqind të vijës kufitare e të lihen për rishqyrtim dy pikat kontestuese Zhlebi dhe Qakorri.
“Ky propozim ka qenë në vitin e kaluar i yni në mbledhjen e Këshillit Drejtues të PDK-së në gusht, që është bërë publik që nga shtatori dhe që e kam potencuar gjatë tërë vitit si zgjidhje e mundshme. Tani kjo shihet më shumë si lojë politike për t’ia zgjatur jetën kësaj qeverie edhe pse e konceptuar gabim sepse është njëra nga arsyet për të rënë kjo qeveri dhe prishur ky koalicion i pakuptimt”, thotë Buja për tesheshi. com.
Ndryshe, qeveria pritet që ta procedojë javën e ardhshme për ratifikim në Kuvend marrëveshjen e Demarkacionit të kufirit me Malin e Zi. /tesheshi.com/
