Prokuroria e Përgjithshme ka nominuar dhe 9 emra të tjerë në kuadër të dekriminalizimit, ku tek deputetët ka befasuar emri i Artan Gaçit, kurrë i përfolur si i inkriminuar.
Duke folur për Top Channel, prej nga është publikuar dhe lista, Gaçi tha se kurrë nuk është ndaluar, arrestuar apo dënuar në Europë apo vende të tjera.
Ndërsa të tjerët janë: Armando Prenga, Gledion Rehovica, Aqif Rakipi, Omer Mamo dhe Mhill Fufi; si dhe kryebashkiakët e Poliçanit, Tepelenës dhe Pogradecit.
Siç shihet pra, në listë është dhe i forti i PDIU-së, Aqif Rakipi, i njohur ndryshe si Qifi, artikuluar kështu dikur me ironi dhe nga kryetari i tij Shpëtim Idrizi.
Në fillimet e parlamentit të pas 23 qershorit, Qifi rrahu në ambientet e brendshme bashkëkrahinarin e tij, Alfred Peza, por ngjarja u kalua pa u bërë shumë e madhe. /tesheshi.com/
