Lideri i partisë më të re Libra, Ben Blushi njofton se dekreti i Presidentit që rrëzon ligjin për importin e mbetjeve nuk vjen as në seancën e ditës së nesërme (e enjte) që pritet të mbahet në Parlament. Në një postim në profilin e tij në facebook, Blushi thotë se koalicioni PS-LSI nuk i ka votat e domosdoshme, ndaj po bëjnë pazare me vende pune për t’i plotësuar ato. Sipas tij, ky ligj do të shtyhet.
“Rilindja dhe LSI duan ta shtyjnë sepse nuk kanë votat. Po negociojnë disa vende pune derisa të bëhen 71 në Kuvend. Ju kisha thënë miqve ambjentalistë të mos kenë shpresë tek ata që premtuan se do ta rrëzojnë ligjin. Cfarë partie! Kanë shumë frikë ta votojnë, kanë po aq frikë ta rrëzojnë. Rilindja ka frikë nga kazanët, LSI ka frikë nga Rilindja. Në fakt, kanë frikë nga e njëjta gjë. Megjithatë, edhe kaq është një fitore e vogël: ligj për importin e mbetjeve nuk ka! Ose më saktë, importi i mbetjeve lejohet, pa ligj, vetëm në një pjesë të territorit të vendit: në Kuvendin e Republikës së Shqipërisë!”, shkruan Blushi./tesheshi.com
