Trajneri i kombëtares shqiptare Gianni De Biasi ka marrë nga presidenti italian medaljen “Ordine Stella d’Italia”.
Ceremonia e dhënies së dekoratës u zhvillua në mjediset e ambasadës italiane në Shqipëri dhe iu dorëzua trajnerit De Biasi nga ambasadori Alberto Kutilo.
Medalja mban motivimin: “për kontributin e tij për marrëdhëniet mes Italisë e Shqipërisë, duke treguar interes për zhvillimin e sportit në Shqipëri, duke kontribuar me përvojën e tij në rritjen e sportit shqiptar”.
Pasi mori medaljen, De Biasi theksoi se ndjehet krenar, pasi ashtu siç thuhet edhe në motivimin e medaljes, ai beson se “kemi krijuar një urë midis dy vendeve. Një det që na ndan, por na bashkon një mendësi”.
Ambasadori Alberto Kutilo nënvizoi se “Italia dhe Shqipëria, në një moment të vështirë të Bashkimit Europian, ku ka vende të cilat mendojnë se edhe mund të dalin, këto dy vende mendojnë se mund të jenë bashkë aty. Sigurisht nuk është meritë vetëm e trajnerit, është edhe e lojtarëve, por ai arriti para nesh, para politikës, të bëjë Shqipërinë pjesë të hartës së Europës. Do të mjaftonte vetëm kjo e fundit për të justifikuar plotësisht çmimin që i jepet De Biazit”.
I pranishëm ishte edhe kryeministri Edi Rama i cili tha se është një nder i madh për të gjithë ne “të jetojmë këtë periudhë historike për Kombëtaren Shqiptare dhe një nder i madh për mua dhe besoj për të gjithë ata që kanë pasur fatin ta njohim nga afër Gianni De Biasin”. /tesheshi.com/
