Nëse Edi Rama do ishte një inatçor i rëndomtë politikë – ku hera-herës edhe është – nuk do ishte i pranishëm në ceremoninë e dekorimit të Massimo D’Alema-s, ish-kryeministrit italian, njëherësh ish-ministër i Jashtëm dhe ish-lideri i së majtës. Pra, është fjala për një personalitet që vjen nga përtejdetit dhe me rol të madh në kauzën kosovare.
D’Alema, i cili prej mbi 10 vitesh nuk ka pasur asnjë rol në qeverinë italiane, në zgjedhjet e fundit braktisi partinë që e themeloi në vitin 2006 së bashku me Walter Veltronin dhe garoi me një parti të re, ku si mision më shumë se të fitonte si senator, kishte rrëzimin e Matteo Renzit nga posti i kreut të PD-së italiane, pra mikut për kokë të Ramës.
Gjithsesi, në vitet e fundit Rama ka marrë shpesh këshillat e D’Alema-s dhe fondacionit të tij, “Italiani Europei”, një think tank me mjaft peshë në sallonet e Romës.
Por në zgjedhjet e fundit D’Alema dhe Renzi ishin më shumë se armiq; ata ishin antagonistë të betuar që luftuan për të shkatërruar njëri-tjetrin. Kjo luftë solli edhe largimin përfundimtar të D’Alema-s nga politika aktive dhe rrëzimin e Renzit nga kreu i PDI-së, ndërkohë që fituesit ishin populistët e Lega-s dhe 5 Yjeve.
Presidenti Ilir Meta e dekoroi D’Alema-n me dekoratën e lartë “Nënë Tereza”, duke e argumentuar me rolin që ish-kryeministri mbajti gjatë luftës në Kosovë.
Realisht, kur Massimo D’Alema ishte në krye të qeverisë italiane, politika e jashtme e atij vendi ndryshoi 100% nga pro-serbe në pro-shqiptare dhe pro-amerikane.
Para D’Alema-s, kryeministër ishte Romano Prodi, e në krye të diplomacisë Lamberto Dini, i cili kishtë arritur të vendoste një veto tek Prodi për politikën filo-Beogradit.
Madje kjo linjë u pa qartë si në Rambuje ashtu edhe në Paris, kur Dini synoi të bënte që shqiptarët e Kosovës të mos e firmosnin marrëveshjen historike që i jepte fund luftës dhe mundësonte kthimin në shtëpi të mijra të zhvendosurve nga Millosheviçi.
Kështu amerikanët sollën D’Alema-n në krye të qeverisë, i cili pati një peshë më të madhe në politikën e jashtme dhe përkrahu bombardimet ndaj Serbisë nga territori italian. Dini nuk do ta lejonte kurrë.
D’Alema thirri edhe të ndjerin Ibrahim Rugova në Romë, pasi u mor peng nga serbët për ta çua në takim me Milosheviçin.
Familja Rugova u strehua në kryeqytetin italian në një nga rezidencat qeveritare me kujdesin personal të Massimo D’Alema-s.
Lobi pro-rus dhe ai pro-serb në politikën italiane është shumë i fortë. Lamberto Dini dhe Romano Prodi arritën marrëveshjen që Telekom Italia-n të blente Telekom Srbija dhe ky pakt ishte pengu i flirtit të Dini-t me Milosheviçin.
Por D’Alema nuk përfundon këtu me shqiptarët. Në vitin 2008, përkatësisht më 17 shkurt kur Kosova shpalli pavarësinë, ai ishte ministër i Jashtëm nën qeverinë e dytë të Romano Prodit dhe e njohu menjëherë shtetin më të ri në Europë.
Pak muaj pas këtij akti politik, qeveria e Prodit u rrëzua. E dini nga kush? Nga Lamberto Dini, miku i Sllobodan Milosheviçit, i cili u bashkua në koalicion me Silvio Berlusconin duke rimarrë qeverinë e vendit…/tesheshi.com/
