Gruaja në krye të diplomacisë europiane, Federica Mogherini, nga Tirana i bëri të qartë opozitës se duhet të hyjë në zgjedhje, e se ky sipas saj, edhe qëndrimi në unison i BE-së.
“BE-ja e ka përsëritur qëndrimin e saj: partitë politike nuk duhet t’u kthejnë shpinën rolit të tyre dhe qytetarët nuk duhen privuar nga zgjedhja e tyre për zgjedhjet e ardhshme vendore. Ky është mesazh nga të gjitha institucionet e BE-së”, deklaroi Mogherini, pak pasi kreu i opozitës Basha, nga Korça tha se dhe ndërkombëtarët e dinë se do ketë zgjedhje të parakohshme, duke deklaruar njëherësh se më 30 qershor nuk do ketë zgjedhje, referuar atyre lokale.
Mogherini e shpalosi qëndrimin e saj gjatë një konference shtypi me kryeministrin Rama, ndërkohë që dhe ky i fundit shprehu bindjen e tij se zgjedhjet e 30 qershorit do mbahen normalisht.
“Zgjedhjet do të mbahen në 30 qershor dhe do të zgjidhen të 61 kryetarët e bashkive dhe këshillave bashkiakë, kjo është pak por e sigurtë. Kush merr pjesë në zgjedhje është zgjedhje e lirë e secilit”, tha Rama.
Mes të dyve u cek dhe çështja e negociatave. Rama tha se qeveria e tij i ka plotësuar kriteret dhe pret vetëm hapjen e tyre.
“Do isha në pozitë të vështirë në rast se ne dhe qeveria nuk do t’i kishim përmbushur detyrat për këtë proces. E kam thënë dhe e përsëris se ne kemi detyrë të bëjmë detyrën tonë deri në fund. Këtë pastaj e vlerëson Komisioni Europian. në rast se ne morëm rekomandimin pozitiv do të thotë se i kishim kryer detyrat. Nëse vendosi ta marrë këtë vendim në qershor, do të thotë se bëhet fjalë për një vendim jashtë nesh. Ne e kemi merituar që vjet rekomandimin pa kushte që i kërkon këshillin të marrë vendim. Kam besim se do të marrin rekomandimin pa kushte, pjesa tjetër do jetë një vendim politik për atë që ata nuk do kenë arritur nga zgjedhjet parlamentare europiane”, tha Rama.
Edhe Mogherini, duke vlerësuar reformat e qeverisë, sidomos atë në Drejtësi, tha se ishte për hapjen e tyre.
“Negociatat nuk janë vetëm në interes të Shqipërisë por edhe në të BE. Vjet patëm vlerësim pozitiv të komisionit. U vendos që vendimi të merret pas një viti. Mund të bëhet më tepër por ju e keni bërë pjesën tuaj. Për mua do ishte zhgënjim nëse ky vendim nuk do merrej tani, pas pak muajsh. E thashë që nuk është punë e thjeshtë por jo e pamundur”, u shpreh shefja e politikës së jashtme në BE.
Mogherini ndodhet në Tiranë në kuadër të një samite rajonal. /tesheshi.com/
