Ministria e Shëndetësisë ka reaguar ditën e sotme në lidhje me akuzat e Partisë Demokratike për check-upin falas. Bëhet fjalë për deklaratën e datës 7 shkurt të këtij viti, të kryetarit të Partisë Demokratike, i cili pretendon se analizat e programit të kontrollit bazë pa pagesë 40-65 vjeç nuk bëhen fare ose bëhen sa për të kaluar radhën, duke sjellë shembullin e një qytetareje që, sipas tij, ka dalë me vlerën e proteinës 25, çka do të thotë, po sipas tij, se gruaja është në gjendje të rëndë dhe në shtratin e dializës, pa sqaruar saktësisht se çfarë përfaqëson në të vërtetë kjo vlerë, ndërkohë që sipas deklaratës, zonja gëzon shëndet të shkëlqyer dhe si Dëshmitare e Jehovait ecën gjithë ditën në këmbë.
Ministria e Shëndetësisë hedh poshtë me forcë deklaratat publike tërësisht joprofesionale dhe çoroditëse, me të cilat PD, siç thotë MSH, është mësuar edhe më herët, kur flet qorrazi për rezultate prostate te gratë që kanë kryer check-up, kur është botërisht e njohur dhe lehtësisht e verifikueshme se kjo paketë nuk përmban teste depistimi për sëmundje të tilla.
“Ministria e Shëndetësisë ju bën thirrje sërish të gjithë shqiptarëve në grupmoshën 40-65 vjeç të përfitojnë nga programi falas i kontrollit bazë shëndetësor pa pagesë, duke e kryer check-up-in pranë qendrës së tyre shëndetësore të vendbanimit”,- përfundon reagimi i Ministrisë së Shëndetësisë. /tesheshi.com/
