Opinioni publik ka ndryshuar pas bombardimeve të fuqishme ruse në Alepo dhe kjo kërkon veprime të reja. Sekretari i Jashtëm britanik, Boris Johnson është i pari diplomat që lë të kuptohet se perëndimi ka vullnetin për të përshkallëzuar aktivitetin ushtarak kundër qeverisë siriane të Bashar Al-Asad, duke theksuar se një takim i ministrave të jashtëm këtë të diel do të shqyrtojë opcione të reja.
Boris Johnson, kreu i diplomacisë britanike, i njohur për qëndrime të drejtpërdrejta, theksoi se nuk dëshiron t’u japë shpresa fallco opozitarëve sirianë, e se mund të bëhet fjalë për një ditë të gjatë “marshimi”, por, sipas tij, “ka më shumë opcione kinetike, ato ushtarake” që po merren në shqyrtim.
Duke pranuar se si rezultat i bombardimeve në Alepo, opinioni publik është bërë më i ndërgjegjshëm, mbetet të shihet nëse mund të ndërtohet një koalicion për opcionin ushtarak në Siri. “Eshtë vitale që ne t’i marrim në konsideratë dhe ne do ta bëjmë tani”, tha ai.
Johnson këmbënguli se asnjë nismë e re ushtarake nuk mund të përparonte pa mbështetjen e Shteteve të Bashkuara por informoi se kishte zhvilluar bisedime me këshilltarë të ngushtë të candidates presidenciale demokrate, Hillary Clinton dhe shtoi se Clinton ka marrë një linjë më të ashpër sesa pararendësi i saj, Barack Obama për Sirinë.
“Pjesa më e madhe e njerëzve po ndryshojnë mendjen për këtë ështje dhe po mendojnë se nuk mund ta lejojmë këtë situatë të vijojë përgjithmonë. Ne nuk mund thjesht ta shohim Alepon të kthehet në pluhur në këtë mënyrë, duhet të bëjmë diçka. Atmosfera në Dhomën e Përfaqësuesve ka ndryshuar nga viti 2013. Nuk mund të profetizoj nëse kjo do të thotë se mund të arrijmë të ndërtojmë një koalicion për veprime më të shpejta. Por ajo që pjesa më e madhe e njerëzve duan të shohin tani, është një spektër opcionesh”, tha Johnson.
Ai gjithashtu la të kuptohet se perëndimi është në prag të braktisjes së formatit të negociatave me praninë e 25 kombeve në grupin e mbështetjes për Sirinë, ku përfshihet edhe Rusia e Irani e në të ardhmen mund të zgjedhë të punojë në një grup më të vogël.
Sipas tij, takimi i fundit i grupit ndërkombëtar të krizave për Sirinë përfundoi me debate dhe gjerësisht ka qenë pa asnjë qëllim. Johnson theksoi: “Nuk ka funksionuar. Sesioni i fundit ishte tepër i hidhur. U shndërrua në një ndeshje në të cilën iranianët u erdhën në ndihmë rusëve. Debati nuk zgjidhi gjë”.
“Eshtë shumë e rëndësishme që të mos i rrisim shumë shpresat. Dhoma e përfaqësuesve u zmbraps shumë nga ndërhyrja kur mori vendim kundër veprimit ushtarak në vitin 2013. Ne mbyllëm hapësirën që u pushtua nga rusët”.
Opcionet nën shqyrtim përfshijnë ndihmë shtesë në frontin humanitar dhe paralajmërimi i banorëve të Alepos për kërcënimet e sulmeve ajrore.
Johnson pohoi gjithashtu se ai po shqyrtonte mundësinë e rritjes së sanksioneve kundër atyre që janë pranë regjimit të Asad dhe rusëve.
Takimi i së dielës në Londër do të diskutojë edhe përgatitjet për sulmin e afërt në Mosul, qytetin e dytë më të madh të Irakut që aktualisht është bastion për ISIS.
Ndërkaq, kryediplomati britanik përsëriti kritikat e tij ndaj rusëve, duke thënë se është e rëndësishme të mos lejohet që një lojë e fajësimit të përgjithshëm të ngatërrojë përgjegjësinë për atë që po ndodh në Siri. Ai tha se 95 për qind e viktimave janë vrarë nga regjimi Asad mbështetur nga rusët dhe iranianët. “Ata janë keqbërësit”, tha ai.
Edhe më hapur Johnson u shpreh se “kemi një problem shumë serioz me Rusinë” dhe i akuzoi rusët se janë “të paqetë dhe agresivë”. Por këmbënguli se përgjigja është angazhimi dhe se mohoi që Rusia përbën të njëjtin kërcënim ndaj Perëndimit si blloku i vjetër sovjetik.
Përgatiti: Juli Prifti – /tesheshi.com/
