Kundërshtimi mbi pagesën e vënë për Rrugën e Kombit, arriti në pikën e një shpërthimi dhune me djegien e të gjithë kompleksit me sportele ngritur për këtë qëllim. Lënë mënjanë qeverinë, Ramën vetë, kuksianët i shkatërruan pronën një prej bashkëkrahinorëve të tyre më të spikatur, Shefqet Kastratit, perandoria e të cilit është plot me kuksianë të punësuar. E megjithatë, ka vend për të thënë se me Shefqetin vetë nuk kanë gjë, ndonëse ia vunë flakën një pjese të pasurisë së tij.
Nisja e pagesës së rrugës nuk ishte diçka e beftë. Prej muajsh, kush udhëtonte në atë rrugë po përgatitej psikologjikisht për një të nesërme ndryshe, duke qenë se po vërente se si ngrihej impianti i pagesës. Edhe qeveria e kishte bërë me dije këtë. Por një media që sot udhëhiqet nga një prej atyre që i ka hapur luftë Ramës, u kujdes që ta servirte lajmin me sa më shumë dramë brenda. Dhe brenda pak ditësh, ajo, drama u instalua shpejt në shpirtrat e drobitur.
Madje mjaftuan 5-6 fjali nga ato që janë pjesë parazitare e ligjërimit opozitar, të tipit “mbush xhepat e oligarkëve”, e deri tek ngacmime me karakter krahinor, për t’i bërë kuksianët të ndjehen viktima të kësaj nisme, gjë sot rezultoi jo vetëm me një përsëritje të gjithë atyre skenave të shëmtuara të tranzicionit, por dhe në një folklorizëm absurd në mbrojtje të dhunës.
Dhe pyetja shtrohet: cila isha ajo oponencë profesionale që iu bë gjatë këtyre ditëve kuotave të zgjedhura qeveritare për pagesën e Rrugës së Kombit? Kush ishin ata zëra nga opozita apo shoqëria civile të cilët me laps e letër, me referenca dhe investigime, me përllogaritje e kalkulime, arritën në pikën sa ta zbulojnë aferën qeveritare? Ku ishin ata ekonomistë e financiarë, që ftohtë fare, siç e do gjuha e shifrave, t’i paraqisnin oponionit paudhësinë qeveritare në ndërmarrjen e saj? Jo vetëm që nuk pati e nuk ka, por nuk e kanë patur për gjë që ata, zërat politikë e ndoca mediatikë, të mos arrijnë të dallojnë taksën nga tarifa, duke e quajtur pagesën me emrin e të parës.
Dhe shikoni reagimin e LSI-së, dy emrave të saj që kanë marrë përsipër komunikimin me publikun, Kryemadhit dhe Vasilit, që flasin qesim, dhe po ashtu ashpërsisht, ndërkohë që në parti kanë dy eksponentë që janë marrë me ekspertizën e pagesës: ish-ministrat Haxhinasto e Dervishi. Këto jo e jo që për asnjë çast nuk dolën të mbronin atë që kanë bërë ose të paraqisnin oponencë, por krerët e partisë së tyre nuk kanë mundur as t’i furnizojnë me ndonjë shifër, ndonjë të dhënë, ndonjë tregues kompromentues, mbi atë që pretendojnë se është aferë qeveritare.
E kush mund ta dijë më mirë se Haxhanisto e Dervishi! Një mister i madh ky pse nuk u ndje zëri i tyre…nga ato që nuk është e vështirë të kuptohet pse! /tesheshi.com/
