Anëtarja e kryesisë së PD-së, Valbona Mezini ka reaguar pas përplasjes në mbledhjen e djeshme të forumit më të lartë drejtues të kësaj partie.
Ish-deputeti Jemin Gjana gjatë mbledhjes tentoi të godasë anëtaren e Kryesisë Valbona Mezini.
Në reagimin e saj Mezini thekson se u sulmua se guxoi të mendojë dhe të flasë ndryshe, duke tentuar t´i bllokojnë fjalën e lirë.
“Interesi juaj ishte shumë i madh, për të mësuar të vërtetën dhe unë e çmoj këtë interes jo për Valbonën, por për merakun e madh që ju dëshmuat se i gjendeni pranë Partisë Demokratike në këto ditë të vështira ku më shumë se kurrë ajo ka nevojë të ringrihet përmes së vërtetës, asaj të vërtete që do ti shërbejë asaj dhe strukturave për t´u ndarë njëherë e përgjithmone nga disfata dhe asfiksimi i mendimit të lirë.
Po zgjedh të flas me gjuhën e thjeshtë për t´iu drejtuar qytetarëve demokratë por jo vetëm, gjithë atyre qytetarëve shqiptarë që duan një Shqipëri me mentalitet gjithëpërfshirës dhe meritokratësh ku nuk është turp të mendosh ndryshe por duhet të rendësh e vraposh për të mësuar të vërtetën e për ta thënë atë publikisht. Mungesa e njohjes së të vërtetës dhe aq më keq fshehja qëllimisht e saj kultivon totalitarizmin dhe diktaturën, për të mos thënë se sjell modën e retrospektivave ku strukturat politike ishin pronë e familjeve mafioze. Nëse nuk je njëri prej nesh, je njëri prej tyre dhe hiqesh qafe. Këtë nuk do të doja ta lejoja me çdo çmim.
Kam moral të artikuloj nevojën imediate që ka demokratizimi i mendimit në partinë time, në partinë tonë. Këtë moral do ta kem derisa të kem frymë. Ky është morali që duhet të na ndajë nga gabimet tona, nga verbëria dhe servilizmi për të rendur pas kryetarëve që t´iu heqim qimen nga xhaketa apo t´u shkundim palltot. Brezi i ri ka ekzigjencën të mendoje për më mirë. Ka instiktin të mendoje për më larg. Lëreni rininë të mendoje dhe flasë, qoftë edhe gabim, atë le ta gjykojë koha.
Ne pikërisht se heshtëm jemi në këtë humbje, madje ngaqë heshtëm vuajtën 50 vjet diktaturën. Unë jam pasardhese e një prej patriotëve të Vlorës të pushkatuar pa gjyq pikërisht sepse foli dhe tha se ylli nuk është i flamurit kombëtar. Sot më turren se guxova të mendoj dhe flas. Historia përsëritet por une nuk dua ta lejoj që kjo të ndodhë në partinë tonë. Ringritja vjen përmes besimit dhe besimi duhet mbjellë për tu korrur dhe këtë në PD duhet ta bëjnë të gjithë bashkë të vjetër e të rinj. Përndryshe ky diell nuk do të ngrohë me dhe ky vend do të jetë streha e batakçinjve”, shkruan Mezini në rrjetet sociale. /tesheshi.com/
