Kryeministri turk e shfrytëzoi një vizitë sot në ambientet e AKP-së, partisë që udhëheq, në Stamboll, për të deklaruar se sulmet ajrore ruse nuk kanë në shënjestër të tyre ISIS-in, por opozitën e moderuar siriane.
“Sipas informacioneve ushtarake që kemi marrë, Rusia ka kryer 57 operacione ajrore, nga të cilat 55 prej tyre kanë qenë kundër opozitës së moderuar, e vetëm dy kundër ISIS-it,” do të deklaronte Davutogllu.
Rusia i filloi sulmet ajrore mbi Sirinë më 30 shtator, duke shpallur si objektiv goditjen e ISIS-it, por që prej atëhere është ndeshur me një valë kritikash nga bashkësia ndërkombëtare, e cila pretendon se avionët rusë po godasin forcat e opozitës siriane.
Përpos kësaj, sulmet ajrore ruse janë shoqëruar me shkelje të hapësirës turke, duke sjellë një tensionim të pazakontë të situatës.
Davutogllu nuk ka ngurruar të flasë dhe mbi këtë çështje. “Ne nuk duam ndonjë tension me Rusinë, por, siç e thashë, pritja që Rusia t’u kushtojë vëmendje hapësirës, kufijve dhe interesave të Turqisë në Siri është e drejta jonë më e natyrshme.” /tesheshi.com/
