Vendimi i Gjykatës Kushtetuese që 24 hektarët kontestues t’i jepen Manastirit të Deçanit, ka nxitur reagime nga të gjitha strukturat e shoqërisë nga Deçani, por edhe nga opozita.
Kryetari i AAK-së në Deçan, njëherësh deputeti i AAK-së, Daut Haradinaj ka shkruar në llogarinë e tij në Facebook për këtë temë duke i kërkuar Manastirit të Deçanit që të distancohet nga dhuratat e regjimit të Millosheviqit.
Ai ka thënë se pse duhet manastiri t’i shfrytëzonte këto prona që nuk janë të tijat dhe se nuk e di si është e mundur që Sava Janjiq të pranojë logjikën e konfrontimit e jo të marrëdhënieve të mira me komunitetin.
“Çka i duhen Manastirit të Deçanit edhe dhjetëra hektarë tokë, që nuk janë pronë e tij! Për çfarë do t’i shfrytëzonte ky Manastir këto prona. Si është e mundur që Sava Janjiq, që është kryekishtar aty, të pranojë logjikën e konfrontimit me komunitetin dhe të mos e kuptojë, se Manastiri mund të lulëzojë e të jetë i qetë në detyrën e tij, vetëm duke pasur marrëdhënie të mira me komunitetin”, ka shkruar Haradinaj, duke shtuar se në kohët më të vështira, manastiri është ruajtur e mbrojtur nga shqiptarët, madje edhe atëherë kur ata kanë pasur edhe fuqinë edhe pushtetin.
Deputeti Haradinaj ka thënë se Manastiri i Deçanit dhe populli i Deçanit duhet të bashkëjetojnë, por jo me plaçkitje mes vete.
“Popullata e Deçanit, historikisht ka qenë miqësore me këtë Manastir dhe kjo duhet të jetë e shkruar edhe në dokumentet e Kishës dhe duhet ta dijë shumë mirë edhe Ati Sava. Popullata dhe Manastiri duhet të bashkëjetojnë, por jo duke plaçkitur nga njëri-tjetri. Manastiri i Deçanit, duhet ta gëzojë pronën e vetë, por jo pronat që kundërligjshëm ia ka dhuruar Regjimi i Millosheviqit. Për më tepër, në emër të paqes dhe të harmonisë me shqiptarët, krerët e Kishës së Deçanit, dhe jo vetëm, do të duhej të ishin distancuar edhe nga rregjimi i Millosheviqit edhe nga dhuratat e tyre. Manastiri i Deçanit duhet ta zgjedh miqësinë me shqiptarët dhe jo vetizolimin”, ka përfunduar Haradinaj. /tesheshi.com/
