Një delegacion shtesë vjen nga Brukseli si mision special për të bindur Gruevskin të pranojë shtyrjen e zgjedhjeve parlamentare. Dërgata e Brukselit pritet që të arrijë sonte në Shkup i përbërë nga euro-deputetët Howitt, Ivo Vajgl dhe Eduard Kukan, ku bashkë me euro-komisarin Johannes Hahn gjatë ditës së nesërme do të bëjnë përpjekje për t’i afruar qëndrimet mes partisë në pushtet, VMRO-DPMNE të Nikolla Gruevskit dhe opozitës rreth datës së zgjedhjeve të ardhshme.
Këtë lajm e ka bërë të ditur agjencia e lajmeve Meta, duke i’u referuar burimeve në Bruksel.
Nuk dihet nëse euro-deputetët do të kenë edhe takim të përbashkët me liderët e katër partive më të mëdha politike.
Vizita vjen dy ditë pasi që Bashkimi Evropian dhe Shtetet e Bashkuara të Amerikës paraqitën vlerësimin se nuk janë krijuar kushte për mbajtjen e zgjedhjeve më 24 prill dhe pas vendimit të VMRO-DPMNE-së që të mos marrë pjesë në negociatat në të cilat do të ndërmjetësojë eksperti belg Peter Vanhaute.
Ndryshe Gruevski dje bojkotoi takimin e liderëve partiakë me ambasadorin e SHBA-ve Xhes Bejli, dhe përfaqësuesin e BE-së, Aivo Orav.
Ndërsa sot partia e tij ka dalë me qëndrim se përfaqësuesit e BE-së dhe SHBA-ve nuk kanë paraqitur argumente të qëndrueshme që nuk janë plotësuar kushtet për zgjedhje në prill. /tesheshi.com/
