Grupimi i tifozëve që përkrahin përfaqësuesen e Kosovës i njohur me emrin Dardanët, vazhdojnë të jenë ende përkrahës të saj, megjithëse në mendje kanë idenë që duhet të ekzistojë vetëm 1 komb dhe të jetë një kombëtare.
Dardanët janë grupimi zyrtar i tifozëve që përkrahin përfaqësuesen e Kosovës, të cilët u formuan pasi FIFA lejoi Kosovën të zhvillojë ndeshje miqësore ndërkombëtare. Një pjesë e tifo grupeve në Kosovë iu bashkangjitën këtij ‘karavani’ të tifozëve, si: “Torcida” nga Mitrovica, “Intelektualët” dhe “Skifterat” nga Gjilani, “Ujqit” nga Ferizaj, “Shqiponjat” nga Peja, e disa të tjera.
Udhëheqësi i këtij tifo grupi (Dardanët), Adnan Musa ka folur ekskluzivisht për portalin tesheshi.com, duke sqaruar arsyen pse kanë vendosur ti përkrahin njejtë si Kosovën ashtu edhe Shqipërinë.
“Ne e rrespektojmë përfaqësuesen e Kosovës sepse jemi bijtë e këtij vendi, ndërkohë e duam kombëtaren shqiptare sepse jemi shqiptar. Jemi të mendimit që të ketë vetëm një komb dhe një kombëtare, por nuk deri sa të eksiztojë përfaqësuesja e Kosovës, ne gjithmonë do jemi afër saj sepse e ndjejmë obligim moral e shpirtëror”, theksoi Musa.
Por, ajo që është vënë re në ndeshjen e fundit që ka zhvilluar përfaqësuesja e Kosovës, ky grupim i tifozëve nuk e ka pëkrahur atë.
“Është e vërtetë që kemi munguar në ndeshjet e fundit që përfaqësuesja e Kosovës i ka zhvilluar në Prishtinë. Arsyeja kryesore është pikërisht lokacioni. Është e papranueshme për ne si tifozë, që përfaqësuesja jonë ti zhvilloj ndeshjet në nje vend ku njerëzit e saj as që e njohin Kosovën dhe ky është një gabim i madh që po e bën Federata e Futbollit të Kosovës. Përderisa ndeshjet të zhvillohen në Prishtinë, ne do ti bojkotojmë ato”, potencoi Musa.
Në Prishtinë vetëm për të festuar
Një gjë është e sigurtë. Tifozët e Kosovës, “Dardanët” do jenë prezentë në vëllazëroren me Shqipërinë ditën e premte, vetëm për të festuar kualifikimin e saj historik, e jo për të përkrahur njërën skuadër.
“Nuk do të ketë organizim për këtë ndeshje. Le të shërbejë kjo vëllazëzore si një hap drejt bashkimit kombëtar. Do shkojmë për të festuar kualifikimin e kombëtares shqiptare në Kampionatin Europian dhe për të bërë një spektakël mbarëkombëtar”, përfundoi Musa.
Ngjashëm mendojnë edhe Skifterat nga Gjilani, të cilët kanë qenë ndër grupet më aktive si në përkrahjen e përfaqësueses së Kosovës, ashtu edhe të Shqipërisë. Udhëheqësi i këtyre tifozëve, Valon Selimi rithekson edhe njëherë mbështetjen e vazhdueshme që do ofrojë ky tifo grup për dy përfaqësueset deri sa të vijë dita kur kombi do bashkohet dhe do bëhet një.
“Normalisht se do e përkrahim përfaqësuesen e Kosovës, pasi ky është vendi ynë. Ne kemi mbështetur dhe do vazhdojmë ta mbështesim edhe kombëtaren shqiptare. Deri sa të ekzistojnë dy përfaqësuese ne do jemi në shërbim të tyre, do jemi krahu i djathtë i tyre apo lojtari i 12-të, sikurse kemi qenë në ndeshjet kualifikuese të Shqipërisë për në Kampionatin Europian. Tani është koha për festë dhe të premten do shkojmë gjithë së bashku të kremtojmë këtë sukses”, u shpreh Selimi.
Ndërkohë, tifo grupi Plisat me kohë kanë shprehur qëndrimet e tyre se përkrahin vetëm kombëtaren shqiptare dhe e shohin të panevojshëm krijimin e reprezentacionit të Kosovës. Ndeshja ndaj Shqipërisë, do të jetë e para që Plisat do e ndjekin Kosovën. Por, qëllimi është i arsyeshëm, festimi i kualifikimit të kombëtares shqiptare për në Europian. Madje, ata kanë bërë thirrje për vendosjen e flamujve shqiptarë në gjithë sheshet e Prishtinës.
“PLISA, Prej orës 18;00 i vendosim flamujt kombëtar nëpër kryeqytet. Kush munet me ardhë prej Plisave me Na ndihmu është i mirëseardhur. Ju presim në fan club”, ka shkruar në fb, kryetari i këtij grupi, Albert Kastrati.
Ndërkohë, grupimi Tifozat Kuq e Zi, kanë vendosur për të bojkotuar këtë ndeshje pasi sipas tyre nuk mund të jenë spektatorë në një arenë ku ndeshen shqiptarët mes vete. Në tribuna jo, por në festë gjithsesi. Ata kanë bërë thirrje gjithë tifozëve shqiptarë, të dalin dhe festojnë kualifikimin e kombëtares shqiptare për në Kampionatin Europian.
Përgatiti: Drilon Sylejmani – /tesheshi.com/
