Ish-vetëvendosësi Dardan Molliqaj, njëherësh bashkëshort i ministres Besa Shahini të Edi Ramës, është njeriu që do zëvëndësojë Shpend Ahmetin e dorëhequr nga kreu i PSD (Partisë Socialdemokrate).
“Sot, Partia Socialdemokrate iu përgjigj thirrjes tuaj për të mos e ndalur përpjekjen, përkundër zhvillimeve të fundit elektorale. Sot treguam që nuk e shohim politikën përmes rezultatit afatshkurtër zgjedhor, por përmes idealeve dhe kauzave që u besojmë.
Pranova zgjedhjen tuaj që ta udhëheq PSD-në në këtë fazë të vështirë, ngase besoj shumë që tek çdo dështim mbarset një përpjekje e re; dhe besoj shumë që rruga e progresit dhe fitores kalon pashmangshëm nëpërmes dështimeve. Vetëm ata që nuk zmbrapsen para krizave mund të prodhojnë diçka të re në politikë”, shkruan Molliqaj.
Por më interesant është fakti se ai ka sulmuar ashpër ish-partinë e tij, duke e quajtur si popoliste, e duke premtuar se do i bëjë opozitë të fortë Albin Kurtit.
“Përtej iluzionit të ndryshimit, Kosovën po e pret qeverisja populiste me mendësi totalitare. Dhe derisa me entuziazëm, popullistët e rinj, parashikojnë që nuk do të ketë opozitë as alternativë përballë pushtetit të tyre, ne do të jemi këtu t’ua kujtojmë që historia s’merr fund me ta. Që ka ende njerëz në Kosovë që besojnë në progres. Ka ende njerëz në Kosovë që nuk i tremb hegjemonia e pushtetit të ri. Që ka ende njerëz në Kosovë që popullizmin e tyre do ta sfidojnë me politikë të majtë progresive. Dhe këta njerëz, një ditë do të bëhen shumë”, shprehet Molliqaj.
Siç u pa më 6 tetor, partia e re e përbërë nga ish-vetëvendosës, PSD-ja e thëmeluar dikur nga Kaqusha Jashari, dështoi të marrë një rezultat pozitiv, duke qenë dhe në aleancë me AAK-në e Haradinajt. /tesheshi.com/
