Është publikuar një sekuencë e përplasjes me sfond politik mes biznesmenit të peshkut Gjergj Luca dhe ish-deputetit dhe kandidatit për të qenë i tillë nga PD-ja në Elbasan, Luçiano Boçi.
Në një konfrontim fizik, ku raporti është 1 me 3 në favor të Boçit, edhe ky i fundit tenton të godasë Lucën, paçka një lloj truproje nga dy të tjerë me të cilët shoqërohej, që gjithsesi tentojnë ndarjen dhe jo sherrin.
Më pas vjen momenti tjetër i diskutueshëm, ai i celularit të Lucës. Ky i fundit pretendon se i ka rënë në tokë gjatë përplajes, e se atë më pas ia marrë Boçi. Edhe kjo skenë del e qartë sipas asaj çfarë thotë Luca, ndonëse duhet dëgjuar dhe versioni i Boçit.
Që të dy kanë bërë kallzime në polici karshi njëri-tjetrit dhe çështja po hetohet.
Luca pretendon se është ngacmuar i pari nga Boçi, ndërsa ky i fundit, veç etiketimit të “plehrë e Ramës” ende nuk ka ofruar versionin e tij për publikun.
Fërkimet Luca-Boçi vijonin prej kohës. Gjergj Luca ka ndërtuar një miniqytet unik biznesi në Fushë-Labinot, te ish-Rezervat e Shtetit, duke punësuar qindra gra. Por njëherësh ai ka shfaqur afeksion ndaj pushtetit, ndonëse kurrë s’është marrë drejtpërdrejt me politikë, me këtë apo atë krah. Madje në kohën e qeverisjes së Nanos u ndëshkua ashpër me nëj gjobë nga ky i fundit për aktivitetin e të famshmes së asaj kohe Rozafa Palace.
Biri i dy artistëve të mëdhenj të artit skenik e kinematografik, Ndrek dhe Mimika Luca, ai madje ka pretenduar se ka qenë më i afërt në afeksion politik me PD-në.
Nga ana tjetër, opozita lokale në Elbasan e ka sulmuar ashpër, ku veçon ish-deputeti Luçiano Boçi, duke përfituar prej një mosmarrëveshjeje tipike tranzicioni mes Lucës dhe disa banorëve të Fushë-Labinotit.
Boçi vjen nga sfera akademike, si pedegog në Universitetin e Elbasanit. Megjithatë, kjo staturë e lartë shoqërore s’ka qenë pengesë që të përfshihej në goditje fizike ndaj Lucës. /tesheshi.com/
