Autoritetet egjiptiane janë në presion për hetime pas vdekjes së ish-Presidentit të vendit Muhamed Mursi në gjykatë. 67 vjeçari Mursi, i cili ishte në burgim që nga largimi nga detyra në vitin 2013, ishte në gjendje të rëndë shëndetësore dhe atij iu mohua trajtimi mjekësor.
Grupi për të drejtat e njeriut, Amnesty International, ka bërë thirrje për një hetim të pavarur dhe transparent ndaj vdekjes që autoritetet thanë se ishte “sulm në zemër”.
Momentet e vdekjes janë treguar nga autoritetet, dhe sipas tyre, ai doli në gjykatore dhe foli për pesë minuta, dhe më pas u alivanos. Ai u transferua në spital, dhe aty u shpall i vdekur, thuhet në një deklaratë të prokurorit publik të Egjiptit.
Familja e tij ka kohë që ka ngritur shqetësime lidhur me shëndetin dhe kushtet në të cilat mbahej në qeli. Ai u varros në Kajro në orët e hershme të mëngjesit të sotëm, me prezencën e disa nga anëtarëve të familjes.
Djali i tij, Abdullah Mursi, i tha Reuters se autoritetet egjiptiane i kanë mohuar familjes së tyre të drejtën e varrosjes me ceremoni në vendlindjen e tij.
Mbështetësit e tij nga Lëvizja Vëllazëria Muslimane si dhe presidenti turk Rexhep Tajip Erdogan kanë deklaruar se vdekja e tij erdhi nga tirania e sunduesve të Egjiptit. /tesheshi.com/
