Zëvendëskryeministri e ministri i Jashtëm serb, Ivica Daçiq, në kulmin e fushatës zgjedhore i ka bërë elozhe ish-shefit të tij në Partinë Socialiste Serbe, diktatorit famëkeq, Sllobodan Millosheviq.
Daçiq tha se se pa Sllobodan Milosheviqin nuk do të kishte rezolutë 1244, e cila i ndihmon Serbisë për të mos e njohur Kosovën shtet.
Daçiq, e tha këtë frazë, në një tekst autorial në gazetën e Beogradit “Novosti”, ku ka shkruar se dhjetë vjet pas vdekjes së Sllobodan Milosheviqit janë pak për gjykimin historik, por se të gjithë bashkëpunëtorët ose partnerët e tij sot e dinë se pa të nuk do ta kishin këtë Serbi.
“Shekulli i ri, në esencë, ka filluar pa të si politikan, por dhjetë vjetët e këtij mileniumi, krahas fundit tragjik të Gjingjiqit, e ka shënuar edhe vdekja e Milosheviqit”, ka thënë Daçiq.
Ai thekson më tej se Serbia dhjetë vjet pas vdekjes së tij është tjetër, më afër Bashkimit Evropian, “kemi kthyer sërish respektin në botë.
“Sërish jemi miq me Rusinë, po bisedojmë me Prishtinën”, ka shkruar ai.
/tesheshi.com/
