Mosndryshimi i numrit të deputetëve edhe pas ritovimit në Teacre, i ka gëzuar si Gruevskin e si Zaevin. Nga partia e të parit, VMRO u deklarua se “dje i gjithë opinioni publik e kuptoi se përkundër të gjitha përpjekjeve, qytetarët e Tearcës kanë parandaluar tentativën inxhinierike post-zgjedhore. Ne i përgëzojmë për këtë. Si fitues të zgjedhjeve, ne mbetemi të angazhuar për hapat e mëtejshme për formimin e qeverisë së re”.
Por nga ana tjetër, edhe pse LSDM priste të merrte një mandat, gjë që nuk ndodhi, sërish kreu i saj Zoran Zaev është shfaqur entuziast.
“Fitorja e shumicës së qytetarëve të vendit që kanë votuar për ndryshime u konfirmua në një Tearcë multietnike. Urime të sinqerta për qytetarët e Tearcës që me votën e tyre shumë precize konfirmuan disponimin e përgjithshëm në Maqedoni. Maqedonia zgjodhi Ndryshime dhe Jetë! Tearca zgjodhi Ndryshim dhe Jetë”, shkroi Zoran Zaevi në facebook.
Tashmë mbetet të luhet loja për qeverinë. VMRO dhe BDI e kanë të vështirë ta rikrijojnë një qeveri pa zgjatur dorën tek partitë e tjera shqiptare. /tesheshi.com/
