Nga modeli i anijes kozmike Star Wars X-Wing te çekiçi “Thor’s”, relike nga filmat e preferuar do të dalin në ankand në Hollywood muajin e ardhshëm, raporton Reuters.
Më shumë se 1,800 artikuj do të dalin në ankand në datat 21-24 qershor, të cilat Propstore, një kompani memorale filmash dhe TV, vlerëson se do të mbledhë më shumë se 9 milionë dollarë. Nuk specifikohet se ku do të drejtohen paratë e grumbulluara.
Drejtori i Propstore, Brandon Alinger i tha Reuters se më shumë se 600 tituj të ndryshëm filmash dhe televizioni ishin të përfaqësuar.
“Përveç rekuizitave dhe kostumeve bazë, ne kemi lodra koleksionuese, komike, materiale për prodhimin e filmit, gjëra si vepra konceptuale arti…”, tha ai.
Në krye është Red Leader X-Wing nga “Star Wars: New Hope”, i vlerësuar nga gjysmë milioni deri në një milion dollarë.
“Ne besojmë se ky është i vetmi X-Wing i vërtetë, i pacenuar, origjinal nga ‘Star Wars’ i parë i ofruar ndonjëherë në ankand publik, kështu që është goxha i veçantë,” tha Alinger.
Artikuj të tjerë që dalin në ankand përfshijnë Gizmo animatronike nga filmi “Gremlins 2: New Litter”, i cili vlerësohet nga 80,000 deri në 120,000 dollarë. Ekziston gjithashtu një çekiç nga filmi “Thor” i vlerësuar nga 100,000 deri në 150,000 dollarë, dhe një model i një avioni të përdorur në “Top Gun”, i cili mund të arrijë nga 30,000 deri në 50,000 dollarë.
Janë gjithashtu në ankand kostumi i Elvis Presley nga “The Happened at the World Fair”, portofoli i Samuel L. Jackson nga “Pulp Fiction”, si dhe shpata e Uma Thurman nga “Kill Bill”. /tesheshi.com/
