Ka vijuar ulje e ngritja e infektimeve në Shqipëri ditë pas dite, duke qëndruar brenda një stabiliteti shifrash, të cilat konsiderohen nga autoritetet si mbajtje e situatës nën kontroll.
Nga 24 një ditë më parë, këtë të premte janë shënuar 21 raste të reja, ku veçon fakti se kryesimin e mban Shkodra me 11 infektime të reja. Kështu, qytetit verior është shndërruar në “delen e zezë” të epidemisë në Shqipëri.
“Në 24 orët e fundit janë testuar 253 persona të dyshuar me COVID-19. Nga rezultatet e testimeve janë konfirmuar 21 raste pozitive me COVID19. Nga rastet e reja 11 i përkasin Shkodrës dhe kemi 4 raste në Tiranë, 4 raste në Krujë dhe hartës i shtohet Kurbini me 2 raste.
Deri në këto momente janë testuar 5080 raste të dyshuara dhe prej tyre janë të konfirmuar pozitivë me COVID-19, 539 raste.
Gjatë 24 orëve të fundit, 6 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 283. Siç shihet edhe në kurbën e epidemisë vijojmë me rritjen e numrit të rasteve të shëruara të cilat për disa ditë rresht kalojnë numrin e rasteve të infektuara”, u tha në deklaratën e përditshme për media nga ana e Ministrisë së Shëndetësisë. /tesheshi.com/
