Në Shtetet e Bashkuara të Amerikës vijon Kupa e Amerikës, në një edicion special të saj. Ndeshjet e para ua kanë lënë vendit atyre të dytave në grup.
Të tilla kanë qenë ato të grupit B në nisje të kësaj të enjteje.
Pas atij barazimi zhgënjyes ndaj Ekuadorit, Brazili ka patur mundësi të shpërthejë ndaj Haitit modest, që asnjëherë nuk është dëgjuar për ndonjë futboll cilësor.
Dhe brazilianët e kanë bërë mjaft mirë punën e tyre, me një fitore tenistike në fund. Brazili ka fituar 7-1 ndaj Haitit.
Tre gola janë realizuar nga Coutinho, dy në gjysmëorëshin e parë, e një në minutat shtesë të lojës. Firmëtarët e golave të tjerë janë Renato Augusto, që shënoi dy herë, Gabriel dhe Lucas Lima. Marcelin thjesht realizoi golin e nderit për Haitin.
Në ndeshjen tjetër të grupit, Ekuadori dhe Peruja janë ndarë në paqe. 2-2 është rezultati i këtij takimi.
Brazili e Peruja e kryesojnë tani grupin me nga 4 pikë. Ekuadori i vendit të tretë ka 2 pikë, e Haiti, në fund, ka veç një zero në tabelë. /tesheshi.com/
