Tekniku italian mund të ketë shpejt fartin e portugezit Mourinho, që më herët ka përjetuar të njëjtën situatë te londinezët e Çelsit.
Conte ia doli ta shpallë kampion Çelsin në vitin e tij të parë të punës, por e ka pisk në këtë pjesë të këtij sezoni.
Çelsi nuk i kishte humbur që nga tetori i 1995-s dy ndeshje të njëpasnjëshme në kampionat me një diferencë prej tre golash. Humbja 4-1 ndaj Uotfordit mbrëmjen e së hënës pasoi atë 0-3 të 31 janarit, ndaj Bornmwthit.
Kjo ishte humbja e gjashtë për Çelsin në Premier Ligë, dhe ndonëse mban ende vendin e katërt, skuadra shpejt mund ta shohë veten jashtë katërshes kryesuese që i siguron pjesëmarrjen në Champions League.
Janë plot 19 pikë diferencë me Mançester Sitin kryesues, shtuar kësaj dhe një lojë që nuk bind aspak; gjithçka flet kundër Conte-s, që, ndryshe, në Itali mund të marrë sërish drejtimin e kombëtares.
Ai vetë duket i qetë, i vetëdijshëm se mund të shkarkohet nga ora në orë.
“Unë punoj. Nëse kjo është e mjaftueshme, në rregull. Përndryshe, klubi duhet të marrë një tjetër vendim,” deklaroi Conte të hënën.
Tekniku italian ka gjithsesi mbështetjen e lojtarëve, më së pari të kapitenit Gary Cahill dhe të portierit Courtois, siç bën me dije BBC-ja. /tesheshi.com/
