SHBA dhe Gjermania duket se kanë vendosur ta presin nyjën Gordiane të Kosovës duke caktuar dy negociatorë me peshë të rëndë, nga ata që në fund vendosin veton nëse nuk ka rezultat.
Kështu, Presidenti Donald Trump pritet t’i thërrasë në ndihmë një republikaneje me ngjyrë, por gjithsesi një emër autoritar jo vetëm tek konservatorët por edhe në diplomacinë e SHBA-së.
Bëhet fjalë as më shumë e as më pak por për Condoleeza Rice, ish-Sekretaren e Shtetit në administratën e Gorge W. Bush, si dhe njeriu më i rëndësishëm i Angela Merkelit, kreu i fraksionit bavarian të CDU-CSU-së, ministri i Financave i Gjermanisë dhe rojtari i parave të Europës, Wolfgang Schaeuble.
Burime diplomatike i thanë tesheshi.com se propozimi ka ardhur nga një komision ekspertësh në Uashington, të cilat kanë hartuar një raport për llogari të Kongresit amerikan, dhe do të shqyrtohet nga Departamenti i Shtetit e më pas nga Presidenti Donald Trump.
Nga ana e saj, kancelarja Merkel e ka dhënë ok dhe pret që të fitojë zgjedhjet për të riorganizuar qeverinë e re.
Njeriu që ajo i besoi boom-in ekonomik të vendit të saj për tre mandate, pritet të mos kandidojë këtë herë për t’u bërë ministri i Financave, ndaj ajo ka menduar t’i japë Wolfgangut të tmerrshëm një rol prestigji të nivelit të lartë.
Duke pasur Ballkanin një prioritet për ta mbyllur njëherë e përgjithmonë si problem, Merkel i ka kërkuar vetë Donald Trump-it që të hyjnë së bashku në lojën për ta bindur Serbinë të njohë Kosovën, duke larguar përfundimisht Rusinë nga Ballkani.
Autori i raportit për llogari të Kongresit amerikan, David Phillips, deklaroi për VOA-n se “Aktualisht Rusia ka vendosur një vijë të re fronti në Luftën e Ftohtë me Perëndimin dhe është në Ballkanin Perëndimor. Sipas njoftimeve, ka ngritur një bazë zbulimi në Nish, ka dërguar armë të sofistikuara në Serbi. Shtetet e Bashkuara dëshirojnë t’i forcojnë partneritetet me vendet e Ballkanit Perëndimor, përfshirë Kosovën dhe Serbinë. Nëse Shtetet e Bashkuara kanë interesa strategjike në atë pjesë të botës, mund ta ushtrojnë ndikimin e tyre, përmes një roli më të madh në dialogun mes Kosovës dhe Serbisë. Vetëm me angazhimin amerikan, ky proces do të mund të ecë përpara”.
Ndërkohë, dialogu aktual me ndërmjetës Mogherinin nuk mund të vazhdojë gjatë, pasi nuk ka rezultat.
Ndaj do të ndiqet modeli i pas-Rambujesë në vitin 1999, ku u fut në lojë Marti Ahtisari dhe ish-kryeministri rus, Viktor Crnomerdin, të cilët hartuan skeleton e rezolutës 1224, që edhe aktualisht është drafti ndërkombëtar i njohur në OKB për Kosovën.
Dy negociatorët, edhe pse tentuan të arrinin një marrëveshje mes palëve, kur e panë që Millosheviç nuk pranoi, atëherë mbyllën dokumentin të cilin e dërguan në NATO.
Edhe me rastin e pavarësisë së Kosovës, Ahtisari vazhdoi negociata të gjata me serbët, por në fund hartoi planin me emrin e tij i cili u kthye në Kushtetutën e Kosovës.
Ky do të jetë pak a shumë modeli i negociatave, ku nga një anë është një e emëruar nga Trump, diplomate me personalitet të fortë që do të përdorë edhe forcën edhe diplomacinë, nga ana tjetër Schaeuble do të ketë në dorë “thesin e parave” për Aleksandër Vuçiçin që të njohë Kosovën dhe për Hashim Thaçin që të pranojë konçensionet e mundshme, që kësaj herë nuk e kanë emrin Zajednicë apo Demarkacion, por ka shumë gjasë që të vihet në pyetje veriu i Kosovës. /tesheshi.com/
