Nga Blendi Gashi
Partitë kosovare dhe kandidatët e tyre për kryetar komunash e asamblist kanë nisur garën për të kërkuar votën e qytetarëve, ku për një muaj do i lodhin me premtime të shumta se me ta në qeverisje mirëqenia do ju përmirësohet.
Kandidatët e partive për kryetar komunash, paturpësisht nëpër shtëpi, rrugë, lokale e kudo tjetër do bëjnë lypësin dhe njëherësh do shtyhen me njëri-tjetrit se kush po e luan rolin më mirë që të gënjejë në shumicën e rasteve qytetarët hallexhinj që të fitojnë pushtetin.
Megjithatë premtimet e tyre nuk priten të shiten lehtë si në zgjedhjet e kaluara kjo për faktin se qytetarët janë lodhur prej 17 vitesh me premtime të njëjta dhe zgjedhjet paralamentare janë një sinjal i qartë se jo në pak komuna partitë që udhëhoqën për ca vite lehtësisht mund të ndëshkohen.
Se PDK e LDK rrezikojnë të humbin disa komuna të mëdha e thonë edhe analistët politikë të cilët i japin epitetin e favoritit në këto zgjedhje Vetëvendosje-s për shkak edhe rezultatit të mirë që mori në zgjedhjet parlamentare, por megjithatë nuk presin që të ndodh një ndryshim i madh siç pretendon VV-ja.
Leon Duhanaj, njohës i rrethanave politike thotë se zgjedhjet lokale, kanë karakter tjetër nga të përgjithshmet, pasi që gjërat janë më të prekshme për qytetarin e rëndomtë dhe kandidatët janë më të afërt me qytetarin.
Duhanaj nuk jep një përgjigje të caktuar se cila prej partive mund të dale më mirë në zgjedhje pasi thotë kjo do varet nga angazhimi që do kenë ato, mobilizimi i aktivistëve dhe si do prezantohen para elektoratit.
“Duhet pasur parasysh se qytetarët kanë filluar ta humbin interesin për t’u bërë pjesë aktive, gjë.që mund të ndodhë që edhe interesimi për të votuar të jetë i ulët. Andaj mund të them se do të fitojnë ata që në radhë të parë kanë mobilizuar votuesit tradicional dhe militantet dhe pastaj edhe votues të tjerë potencial”, thotë Duhanaj për tesheshi.com.
Fadil Lepaja, analist politik edhe pse pret një konfirmim të rritjes që e kishte Vetëvendosje në zgjedhjet nacionale nuk pret që ky subjekt të fitojë aq shumë komuna sa edhe prentendon.
“Nuk shoh shumë gjasa që Vetëvendosje të fitojë në shumë komuna për shkak të koalicioneve të mundshme të partive tjera për të penguar fitoren e saj. Megjithatë pres që Vetëvendosje ta fitojë komunën e Prizrenit, pra t’ia marrë pushtetin PDK-së atje”, thotë Lepaja për tesheshi.com.
Islam Krasniqi, njohës i rrethanave politike nuk beson se në zgjedhjet lokale do të ketë ndryshime të mëdha, pasi thotë se disa komuna janë bërë bastione të partive të caktuara në të cilat po përsëriten gati rezultate të njëjta.
Ai thotë se akoma qytetarët nuk janë vetëdisuar që t’i ndëshkojnë ata që i mashtruan, që ju premtuan apo edhe ju morrën votën pa dashje.
“Përveç Vetëvendosjes nuk pres rritje të partive tjera. VV-ja përveç Prishtinës pritet të marr edhe Gjilanin, pra ta rrëzoj LDK-në nga pushteti atje. Ndërsa besoj se LDK-ja do të mbajë komunat tjera me të cilat udhëheq.
PDK-ja rrezikon të humbë Prizrenin, kurse AKR-ja e Behgjet Pacollit do të ndëshkohet duke mos marrë asnjë komunë!”, thotë Krasniqi për tesheshi.com.
Kujtojmë se deputetja e Vetëvendosje-s Albulena Haxhiu të enjten përmes një shkrimi në Facebook ka paralajmëruar PDK-në e LDK-në se do të pësojnë tronditje në këto zgjedhje, por që këto të fundit në ditën e parë të fushatës kanë shprehur bindjen se do të triumfojnë në shumicën e komunave të vendit. /tesheshi.com/
