Agjencia e Statistikave të Kosovës (ASK) ka publikuar “Indeksin e Harmonizuar të Çmimeve të Konsumit (IHÇK) për muajin prill 2015.
Indeksi i Harmonizuar i Çmimeve të Konsumit në Kosovë pësoi rënie për 0.8% në muajin prill 2015, krahasuar me muajin mars 2015.
Rënie e Indeksit të Harmonizuar të Çmimeve të Konsumit vërehet te nëngrupet: qumësht, djath dhe vezë (-1.0%); rrymë, gaz dhe lëndë djegëse të tjera (-15.7% ) (Aplikimi i tarifave verore të energjisë elektrike nga 1 prill deri më 30 shtator 2015). Këto dy grupe të konsumit ndikuan në rënien e indeksit të përgjithshëm për (-1.1 për qind).
Rënia u neutralizua kryesisht nga ngritja e Indeksit të Harmonizuar të Çmimeve të Konsumit te nëngrupet: mish 0.6%, pemë 3.5%, perime 1.5% dhe përdorimi i pajisjeve për transportin personal (naftë dhe benzinë) për 0.9%, me një ndikim të përbashkët të këtyre nëngrupeve prej 0.3 për qind në IHÇK.
Indeksi i Harmonizuar i Çmimeve të Konsumit pësoi rënie për 0.4% në muajin prill 2015, krahasuar me muajin prill 2014. Rënie e Indeksit të Harmonizuar të Çmimeve të Konsumit në këtë periudhë është vërejtur te nëngrupet: qumësht, djath dhe vezë (-3.8%); përdorim i pajisjeve për transportin personal (naftë dhe benzinë) (-11.8%); arsim i lartë (-28.1%); si dhe shërbime dhe strehim i studentëve (-15.8%), me një ndikim të përbashkët të këtyre nëngrupeve prej (-1.9 për qind) në IHÇK.
Rënia u neutralizua kryesisht nga ngritja e Indeksit të Harmonizuar të Çmimeve të Konsumit te nëngrupet: bukë dhe drithëra (1.3%); mish (1.5%); pemë (6.4%), perime (14.2%), duhan (4.1%); dhe rrymë, gaz dhe lëndë djegëse të tjera për (6.1%), me një ndikim të përbashkët të këtyre nëngrupeve prej 1.5 për qind në IHÇK.
Shkalla e inflacionit e matur në muajin prill 2015, me muajin prill 2014, ishte (-0.4%).
